ساداق اتۋدان قازاقستان قۇراماسى جاڭا ماۋسىمدا ءبىر ليسەنزيالىق تۋرنيرگە قاتىسادى.
بۇل تۋرالى كوماندانىڭ باس باپكەرى ارتەم كيچكين مالىمدەدى، دەپ حابارلايدى Almaty-akshamy.kz Olympic.kz-كە سىلتەمە جاساپ.
باپكەردىڭ ايتۋىنشا، پاريج وليمپياداسىنىڭ جولداماسىنا قازاقستان ايەلدەر كومانداسى تالاسىپ كورەدى.
"قىسقى كەزەڭدە جالپى دەنە جاتتىعۋىنا كوپ كوڭىل بولەمىز. قازىرگى تاڭدا ءبىر عانا ليسەنزيالىق تۋرنير قالدى. ماۋسىم ايىندا تۇركيانىڭ انتاليا قالاسىندا الەم كۋبوگى كەزەڭى وتەدى. سول سىندا جەكە جانە كوماندالىق سىندا وليمپيادانىڭ سوڭعى جولدامالارى ۇلەستىرىلەدى. سول سىنعا قىزدار كومانداسى قاتىسىپ، سوڭعى مۇمكىندىكتى پايدالانىپ كورەدى"، - دەدى كيچكين.
ايتا كەتەلىك، ساداق اتۋدان قازاقستان ەرلەر قۇراماسى پاريج جولداماسىن يەلەندى. قازىرگى تاڭدا ولار وليمپيادا ويىندارىنا دايىندىقتى جالعاستىرۋدا.
"جەلتوقسان مەن قاڭتار ايلارىندا جالپى دەنە جاتتىعۋىنا كوپ كوڭىل بولىنەدى. اقپان مەن ناۋرىزدان باستاپ جارىستارعا دايىندالا باستايمىز"، - دەدى باپكەر.