اقتوبە قالاسىندا ەڭبەكتەيتىن سابيلەر بايقاۋى ءوتتى. سىنعا بارلىعى 70 بالا قاتىستى، دەپ حابارلايدى almaty-akshamy.kz قازاقپاراتقا سىلتەمە جاساپ.
بالالار كۇنى اقتوبە وبلىسىنىڭ بارلىق اۋدانى مەن ورتالىعىندا مادەني-سپورتتىق شارا ءوتىپ جاتىر.
تۇڭعىش پرەزيدەنت اتىنداعى ورتالىق ساياباقتا ەڭبەكتەۋدەن جارىس ءوتىپ، قولاربا شەرۋى بولدى. سونىمەن بىرگە بالالار ءۇشاياقتى ۆەلوسيپەد ايداپ، جارىستى.
«ءبىز بىلتىر ەڭبەكتەۋدەن ۇيىمداستىرىلعان جارىسقا قاتىسقىمىز كەلدى. ءبىراق اي-كۇنىمىز كىشى بولدى. ال بيىل 1 جاسقا تولىپ، ب ا ق سىنادىق. تولقۋ بولدى. بالا كوپشىلىك اراسىندا جۇرگەن سوڭ شارشاپ تا قالادى. الايدا ءبارى كوڭىلدى، قىزىقتى. ۇتۋ، جەڭىسكە جەتۋ ەمەس، وسىنداي سىنعا قاتىسۋ ماڭىزدى دەپ ويلايمىن»، - دەدى قالا تۇرعىنى يۋليا ۆولكوۆا.
سونىمەن بىرگە قالالىق جاس ناتۋراليستەر ستانساسى اڭ-قۇستى كورمەگە شىعاردى. وندا لاق، قويان، ءتىپتى قىران، كوگەرشىن، ۇلۋ بار.
«70 جىلدىق تاريحى بار ستانساسى ەكولوگيالىق، بيولوگيالىق باعىتتا جۇمىس ىستەيدى. كورمەگە جانۋاردىڭ 15 ءتۇرىن اكەلدىك. بالالار ۋاقىتىن ءتيىمدى وتكىزۋ ءۇشىن ۇيىرمەگە قاتىسادى. وندا جانۋارلاردى زەرتتەيدى، باقىلايدى. قولىمەن تاماقتاندىرادى. بىزدە كانادالىق قاسقىر دا، تاسباقا دا بار»، - دەدى قالالىق جاس ناتۋراليستەر ستانساسى ديرەكتورىنىڭ ورىنباسارى ديدارا كەنجەعارينا.
ساياباقتا ۇيىمداستىرىلعان قولاربالار شەرۋىنە 70، ۆەلوسيپەدپەن جۇرۋگە 70 بالا قاتىستى. اقتوبەلىكتەر قاعاز، ءتۇرلى ماتا مەن قاعازدان بالالار ارباسىن ساندەگەن. ءبىرى ءترلى ەرتەگىلەرگە سۇيەنسە، كەيبىرى ۇلتتىق ناقىشتا كوركەمدەدى.
«بۇگىنگى جاس ۇرپاق – ەلىمىزدىڭ ەرتەڭگى كۇنگە دەگەن ءۇمىتى. بۇل مەرەكە اتا-انالار ءۇشىن دە، مەملەكەت ءۇشىن دە ۇلكەن ماڭىزعا يە. اقتوبە وبلىسىندا 200 مىڭنان استام بالا بار. سىزدەر لايىقتى تاربيە السىن، ۇلتتىق تامىرىنان اجىراماسىن، زامانعا بەيىم بولسىن، بوس ۋاقىتىن پايدالى وتكىزسىن، قاجەتتى ەم-دومىن ەش كەدەرگىسىز السىن، ارمان-قيالىنىڭ شىندىققا اينالارىنا سەنسىن دەگەن ماقساتپەن وڭىردە قانشاما اۋقىمدى شارالار اتقارىلىپ جاتىر، بولاشاقتا دا جالعاسىن تابا بەرمەك. ءوڭىر باسشىسى رەتىندە مەن، ءاردايىم بالالارعا ارنالعان جوبالارعا قولداۋ كورسەتىپ، ارماندارىڭىزدىڭ ورىندالۋىنا جاعداي جاساپ كەلەمىن. مەنىڭ سىزدەرگە ارتار ءۇمىتىم زور جانە ەرتەڭگى كۇنى وبلىسىمىز بەن مەملەكەتىمىزدىڭ اتىن شىعاراتىن، ەلگە تانىتاتىن ازاماتتار بولاسىزدار دەپ سەنىم بىلدىرەمىن»،- دەدى وبلىس اكىمى ەرالى توعجانوۆ.