ق ر پرەمەر-مينيسترى ولجاس بەكتەنوۆ قوستاناي وبلىسىنا جۇمىس ساپارى اياسىندا رۋدنىي قالاسىندا بولىپ، سوكولوۆ-سارىباي تاۋ-كەن بايىتۋ وندىرىستىك بىرلەستىگىندە (سسكوب) قارا مەتاللۋرگيانىڭ دامۋىمەن جانە رۋدنىي جەو-دا جىلىتۋ ماۋسىمىنىڭ بارىسىمەن تانىستى، دەپ حابارلايدى aqshamnews.kz
پرەمەر-مينيسترگە ERG كومپانياسى مەن سسكوب-تىڭ اعىمداعى كورسەتكىشتەرى مەن دامۋ جوسپارلارى باياندالدى. سسكوب جىلىنا 35 ملن توننا كەن، 9 ملن توننا كونسەنترات جانە 8 ملن توننا تۇيىرشىك وندىرەدى. 2024 جىلى رەسەي مەن قىتايعا 371 ملرد تەڭگەدەن استام سوماعا 9 ملن توننا ءونىم ەكسپورتتالدى.
ERG باس ديرەكتورى سەرىك شاحاجانوۆ جىلىنا 2 ملن توننا ىستىق بريكەتتەلگەن تەمىر (ىبت) وندىرەتىن جاڭا زاۋىت قۇرىلىسى تۋرالى جوبانى تانىستىردى. ينۆەستيسيا كولەمى 500 ملرد تەڭگەنى قۇرايتىن بۇل زاۋىت 1،1 مىڭ جۇمىس ورنىن اشۋعا مۇمكىندىك بەرەدى.
ولجاس بەكتەنوۆ ىبت زاۋىتىن سالۋ يندۋستريانى نىعايتۋعا جانە مەملەكەتتىڭ باسەكەگە قابىلەتتىلىگىن ارتتىرۋعا ىقپال ەتەتىنىن اتاپ ءوتتى. زاۋىتتى قاجەتتى گازبەن قامتاماسىز ەتۋ ءۇشىن اقتوبە وبلىسىنان قوستاناي قالاسىنا دەيىن ماگيسترالدى گاز قۇبىرىن سالۋ جوباسى ماقۇلدانعان.
سسكوب قۇرامىنداعى رۋدنىي جەو-دا نەگىزگى جانە قوسالقى جابدىقتاردىڭ جوندەۋ جۇمىستارى اياقتالىپ، قاجەتتى وتىن مەن ماتەريالدار قورى دايىندالعان. قورشاعان ورتاعا اسەردى ازايتۋ ءۇشىن ءتۇتىن قۇبىرلارىنداعى شىعىندىلاردى باقىلاۋدىڭ اۆتوماتتاندىرىلعان جۇيەسى ەنگىزىلۋدە.
وبلىس اكىمىنىڭ ورىنباسارى بەرىك تانجارىقوۆ وبلىستاعى جىلىتۋ ماۋسىمىنىڭ شتاتتىق رەجيمدە ءوتىپ جاتقانىن جانە جابدىقتاردى جاڭعىرتۋ ارقاسىندا جىلۋ جەلىلەرىنىڭ توزۋى 57%-دان 45،7%-عا دەيىن تومەندەگەنىن حابارلادى.
ولجاس بەكتەنوۆ ونەركاسىپتىك نىسانداردىڭ ۇزدىكسىز جۇمىسىن قامتاماسىز ەتەتىن كوممۋنالدىق ينفراقۇرىلىمدى ۋاقتىلى جاڭعىرتۋدىڭ ماڭىزدىلىعىن اتاپ ءوتتى. بۇل ايماقتاعى تۇراقتى دامۋعا ىقپال ەتەتىن نەگىزگى فاكتور رەتىندە باعالاندى.