رۋبل 4 تەڭگەگە دەيىن تومەندەۋى مۇمكىن.
قارجىگەر راسۋل رىسمامبەتوۆ وسىنداي بولجام ايتتى. ساراپشىلار رەسەي ۆاليۋتاسىنىڭ السىرەۋىنىڭ سەبەبىن كورشى ەلدەگى بيۋدجەت تاپشىلىعىمەن تۇسىندىرەدى. ياعني، شىعىن كىرىستەن اسىپ تۇسەدى. ءقازىر كورشى ەلدە ەكسپورتقا قاراعاندا يمپورت كوپ، دەپ حابارلايدى Almaty-akshamy.kz.
ەكونوميست ارمان بەيسەمبايەۆتىڭ ايتۋىنشا، مۇنداي جاعدايدا قازاقستاندا 2014 جىلعى جاعداي قايتالانۋى مۇمكىن. باعانىڭ تومەندەۋىنە بايلانىستى ادامدار رەسەيلىك تاۋارلاردى كوبىرەك ساتىپ الا باستايدى، -دەپ جازدى 24.kz. ال بۇل قازاقستاندىق وندىرۋشىلەر ءۇشىن ۇلكەن ءقاۋىپ توندىرەدى. ۇلتتىق بانك بۇعان جول بەرمەۋ كەرەك دەيدى.
- ەگەر دە وسىنداي ديەۆولۆاسيا بولا بەرسە، باياعىدا وزدەرىڭىز بىلەسىزدەر 2015 جىلى تەڭگەنىڭ قۇنى رۋبلگە شاققاندا 3 تەڭگەگە دەيىن بولىپ، شەكاراعا جاقىن، بۇكىل قازاقستاندىقتار رەسەيگە تۇتىنۋ تاۋارلارىن الۋعا كوشكەن بولاتىن. بۇل ءبىر جاعىنان جاقسى. ارزان باعامەن تۇتىنۋشى تاۋارلار، سونىڭ ىشىندە كولىكتەرگە دەيىن ءتيىمدى بولىپ، بەلگىلى ءبىر دەڭگەيدە وزدەرىنىڭ تۇرمىستىق جاعدايىن وڭتايلاندىرۋعا قول جەتكىزدى. ءبىراق سونىمەن بىرگە ءوزىمىزدىڭ تاۋار وندىرۋشىلەرگە تەرىس اسەرىن تيگىزەدى. ءبىز وزىمىزدە مىندەتتى تۇردە وندىرىستىك تاۋارلار نارقىن قولعا الۋىمىز كەرەك. ول ءۇشىن ۆاليۋتانىڭ تۇراقتىلىعى كەرەك جانە مونەتارلىق ساياساتتى، ياعني ەكسپورتتىق-يمپورتتىق قاتىناستى ءتيىمدى ۇستاي ءبىلۋ كەرەك، دەيدى ەكونوميست باۋىرجان يسابەكوۆ.