روزا باعلانوۆا 1922 جىلى 1-قاڭتاردا دۇنيەگە كەلگەن
قازاقتىڭ بۇلبۇل ءانشىسى روزا باعلانوۆانىڭ 100 جىلدىعىنا وراي #روزاباعلانوۆا100 جىل چەللەندجىن باستالدى. بۇل تۋرالى Almaty-akshamy.kz قازاقكونسەرتتىڭ باسپا ءسوز قىزمەتىنە سىلتەمە جاساپ حابارلايدى.
جاڭا 2022 جىل كۇنتىزبەسىنىڭ العاشقى پاراعىن قازاقتىڭ بۇلبۇل ءانشىسى روزا باعلانوۆانىڭ 100 جىلدىق مەرەيتويى اشادى.
قازاقستاننىڭ جانە كسرو-نىڭ حالىق ءارتىسى، حالىق قاھارمانى روزا باعلانوۆا 1922 جىلى 1-قاڭتار كۇنى دۇنيەگە كەلگەن. بار عۇمىرىن قازاق ونەرىنىڭ وركەندەۋىنە ارناعان روزا ءتاجىباي قىزى جارتى عاسىردان استام ۋاقىت بويى «قازاقكونسەرت» ۇيىمىندا ەڭبەك ەتكەن.
وسىعان وراي روزا باعلانوۆامەن ارىپتەس بولىپ، ءتالىمىن العان قازاقكونسەرت انشىلەرى العاشقىلاردىڭ ءبىرى بولىپ #روزاباعلانوۆا100جىل مۋزىكالىق چەللەندج ۇسىندى. الەۋمەتتىك جەلىدە تارالىپ جاتقان جاڭا چەللەندجدى قازاقستاننىڭ حالىق ءارتىسى روزا رىمبايەۆا باستادى. ول بارشا قازاقستاندىقتاردى قۇتتىقتاپ، ەستافەتانى «بۇلبۇل» سەريالىندا روزا باعلانوۆانىڭ وبرازىن شەبەر سومداعان جاس اكتريسا، «استانا ميۋزيكل» تەاترىنىڭ ءارتىسى زارينا جاكەنوۆاعا جولدادى.
ەسكە سالساق، وتكەن جىلى 24 قاراشادا يۋنەسكو-نىڭ (بۇۇ ءبىلىم، عىلىم جانە مادەنيەت جونىندەگى ۇيىمى) 2022-2023 جىلدارعا ارنالعان حالىقارالىق مەرەيتويلار ءتىزىمى قابىلدانىپ، وعان قازاقستاننىڭ ۇسىنىسىمەن احمەت بايتۇرسىن ۇلىنىڭ 150 جىلدىعى مەن روزا باعلانوۆانىڭ 100 جىلدىعى ەندى. وسىلايشا، قازاقستاننىڭ قوس تۇلعاسىنىڭ مەرەيتويلارى يۋنەسكو كولەمىندە اتالىپ وتپەك.