بۇدان بۇرىن ەلىمىزدىڭ ونەر ۇجىمى «قازاقكونسەرتكە» روزا باعلانوۆانىڭ ەسىمى بەرىلگەنىن جازعانبىز.
بۇگىن يۋنەسكو-نىڭ 41ء-شى باس كونفەرەنسياسىنىڭ ارنايى قارارىمەن 2022-2023 جىلدارعا ارنالعان حالىقارالىق مەرەيتويلار ءتىزىمى قابىلدانىپ، وعان قازاقستاننىڭ ۇسىنىسىمەن ءانشى روزا باعلانوۆانىڭ 100 جىلدىعى ەندى، دەپ حابارلايدى Almaty-akshamy.kz ق ر ءسىم باسپا ءسوز قىزمەتىنە سىلتەمە جاساپ.
قازاقستاننىڭ فرانسياداعى ەلشىسى جانە يۋنەسكو جانىنداعى تۇراقتى وكىلى جان عالييەۆ باس كونفەرەنسياعا ۇسىنىستارىمىزدى قولداعانى ءۇشىن العىس ءبىلدىرىپ، مۇشە مەملەكەتتەردى جانە ۇيىم حاتشىلىعىن اتالعان مەرەيتويلار اياسىندا ەلىمىزدە جانە شەتەلدە وتكىزىلۋى جوسپارلانىپ وتىرعان ءىس-شارالارعا قاتىسۋعا شاقىردى.
روزا ءتاجىباي قىزى باعلانوۆا – ءانشى، قازاقستاننىڭ (1955) جانە بۇرىنعى كسرو حالىق ءارتىسى (1967)، حالىق قاھارمانى (1996).