قازاقستاندا كوروناۆيرۋسقا قارسى ەكپەنىڭ ءۇشىنشى ساتىسى باستالدى. ريەۆاكسيناسيا قارقىندى ءجۇرىپ جاتىر. دەگەنمەن ەلىمىزدىڭ ەكى وبلىسى ءالى دە «قىزىل» ايماقتا. ال پاندەميا جاعدايىنداعى الەمنىڭ ءحالى نەشىك؟
Covid-19 تارالۋىنا جول بەرمەۋ جونىندەگى ۆاك-تىڭ تەلەگرام كانالىنىڭ مالىمەتتەرىنە سايكەس، دۇنيە ءجۇزىنىڭ ەپيداحۋالىنا شولۋ جاسايىق.
امەريكا قۇراما شتاتتارى ازاماتتاردىڭ ءومىرى مەن دەنساۋلىعىنا ءقاۋىپ توندىرەتىن تاۋەكەلى جوعارى ەلدەردىڭ ءتىزىمىن ازىرلەۋدە. اقش-تىڭ اۋرۋلاردى باقىلاۋ جانە الدىن-الۋ ورتالىعى (CDC) COVID-19 اۋرۋشاڭدىعى ءورشىپ تۇرعان گەرمانيا مەن دانياعا ساپارلاردى شەكتەۋدى ۇسىنادى. حابارلامادا ءقاۋىپتىڭ «ءتورتىنشى دەڭگەيى» بەرىلگەن وسى ەكى ەۋروپالىق ەلگە بارۋدان باس تارتۋ، ال ول مۇمكىن بولماعان جاعدايدا ساپارعا شىعۋ ءۇشىن الدىمەن تولىق ۆاكسيناسيادان ءوتۋ كەرەكتىگى تۋرالى مالىمدەلگەن. CDC قالىپتاستىرعان تىزىمگە سوڭعى ايدا 100 مىڭ ادامعا شاققاندا 500-دەن استام COVID-19 جۇقتىرۋ جاعدايى تىركەلگەن 75 ەل ەنگەن.
نورۆەگيا كوروناۆيرۋس تارالۋىنىڭ كەزەكتى تولقىنىنىڭ الدىندا تۇر جانە بۇل احۋال ەل بيلىگىن الاڭداتىپ وتىر. قاراشا ايىنان باستاپ ەلدە SARS-CoV-2 جاڭا شتامىن جۇقتىرۋدىڭ 34 848 جاعدايى انىقتالدى. بۇل كورسەتكىش، ياعني 30 000-نان استام كۆي فاكتىلەرى پاندەميا باستالعاننان بەرى تەك قاراشا ايىندا تىركەلىپ وتىر.
«ءبىز كوروناۆيرۋس ينفەكسياسىمەن كۇرەسۋىمىز كەرەك. ياعني بەتپەردە كيۋ، الەۋمەتتىك قاشىقتىقتى ساقتاۋ جانە باسقا دا شەكتەۋلەر، سونداي - اق العاشقى بەلگىلەر بايقالعان ساتتە، ۇيدە ەمدەلۋ سىندى قاۋىپسىزدىك تالاپتارى ورىندالۋى قاجەت»،-دەدى نورۆەگيا پرەمەر-مينيسترى يوناس گار ستورە.
قازىرگى ۋاقىتتا نورۆەگيادا كوروناۆيرۋس ينفەكسياسىنا شالدىعۋ دەرەكتەرىنىڭ جالپى سانى 192 700-گە جۋىقتادى.
وتكەن تاۋلىكتە وڭتۇستىك كورەيادا COVID-19 جۇقتىرۋدىڭ 2 699 جاعدايى انىقتالدى. ەلدە راستالعان دەرەكتەردىڭ جالپى سانى 420 950-گە دەيىن جەتتى. سونىمەن قاتار كۇن سايىن وڭتۇستىك كورەيادا 100 مىڭنان استام ادام COVID-19-عا قارسى ەكپە سالدىرۋدا. ءبىر كۇن بۇرىن 136 809 ازامات ۆيرۋسقا قارسى ەكپە الدى. ونىڭ ىشىندە ەكىنشى دوزانى 87 611 ادام قابىلدادى. وسىلايشا، 23 قاراشادا 42 290 047 تۇرعىن العاشقى دوزامەن يممۋنيزاسيالاندى، 40 585 580 ادام ۆاكسيناسيالاۋدىڭ تولىق كۋرسىنان ءوتتى. ەل بيلىگى حالىقتىڭ 79% - ى كوروناۆيرۋس ينفەكسياسىنا قارسى تولىق ەگىلگەنىن مالىمدەدى.
22 قاراشادا گرۋزيادا پاندەميا باستالعاننان بەرى 814 097 كوروناۆيرۋس دەرەگى تىركەلدى. بۇل كورسەتكىشپەن الەمدە 47ء-شى ورىندا تۇر. امەريكالىق تابلويدتار گرۋزيانى كوروناۆيرۋس سالدارىنان كوز جۇمۋ دەرەكتەرى بويىنشا الەم ەلدەرى اراسىندا ءبىرىنشى ورىنعا شىعاردى. «نيۋ-يورك تايمس» گازەتىنىڭ جاريالاعان ستاتيستيكالىق مالىمەتتەرىنە سايكەس سوڭعى اپتادا اۋرۋدان قايتىس بولۋ كورسەتكىشىنىڭ كۇن سايىنعى دەرەگى 74 ادامدى قۇراپ وتىر. بۇل 100 مىڭ تۇرعىنعا شاققاندا 2 ءولىم-جىتىم جاعدايىن كورسەتەدى. جالپى، ەلدە 11 553 ادام قايتىس بولدى. باسىلىمنىڭ مالىمەتىنشە، ينفەكسيا سالدارىنان كوز جۇمۋ دەڭگەيى بويىنشا گرۋزيادان كەيىنگى ورىندا بولگاريا، مولدوۆا، ۋكراينا، حورۆاتيا جانە لاتۆيا مەملەكەتتەرى تۇر.
الداعى 20 كۇندە جاريالانعان ۇلتتىق لوكداۋن اياسىندا اۆستريا ۇكىمەتى ۆاكسيناسياعا كۇمانى بار ازاماتتاردى ءار-تۇرلى جولمەن COVID-19 ينفەكسياسىنا قارسى ۆاكسينا الۋعا قىزىقتىرۋ جۇمىستارىن جۇرگىزۋدە. وسىلايشا، باستى جۇلدە - ءۇي جانە ەلەكتروموبيل بولىپ تابلاتىن «كوروناۆيرۋس» لوتەرەياسىنىڭ ويناتىلۋى جاريالاندى. ۇتىس ويىنىنا 18 جاستان اسقان ازاماتتار قاتىسا الادى. جالپى العاندا، بۇل لوتەرەيادا مىڭعا جۋىق جۇلدە ويناتىلادى. جەڭىمپازدار روجدەستۆو قارساڭىندا جاريالانادى.
رەسەيدىڭ ن.گامالەيا اتىنداعى عىلىمي زەرىتتەۋ ورتالىعىنىڭ باسشىسى الەمدە كوروناۆيرۋسقا قارسى جۇرگىزىلگەن زەرتتەۋلەر تۋرالى ايتا وتىرىپ، عالىمداردىڭ ارەكەتتەرى تەك ەمدەۋ مۇمكىندىكتەرىن باعالاۋعا عانا بايلانىستى ەكەنىن حابارلادى. سونىمەن قاتار الەمدە كوروناۆيرۋستى زەرتتەۋدە ەرەكشە جەتىستىكتەر جوق ەكەنىن باياندادى.
«بارلىق جەتىستىكتەر ەمدەۋ مۇمكىندىگىنە باعىتتالعان، ويتكەنى ۆاكسينالار بار، سايكەسىنشە ولاردى جەتىلدىرۋ جۇمىستارى جۇرگىزىلەدى. ءبىراق ءبىز الدىن - الۋ جۇمىستارىن ەمەس، تەك سىرتقى اسەرگە توتەپ بەرۋدەمىز»، - دەدى ا.گينسبۋرگ.
عالىم پاندەميا تەك ۇجىمدىق يممۋنيتەتتى قالىپتاستىرۋمەن اياقتالادى دەپ سانايدى جانە وعان جەتۋدىڭ جالعىز جولى – الەمدەگى جاپپاي ۆاكسيناسيا.