«الەمنىڭ التىن جازۋشىسى» ديپلومى قازاقستاندىق قالامگەر روللان سەيسەنبايەۆقا تابىس ەتىلدى.
بۇل جوعارى اتاق جەر شارىنىڭ وزىق ويلى، كورنەكتى جازۋشىلارىنا رۋحاني ەڭبەكتەرى مەن قۋاتتى شىعارماشىلىق ۇمتىلىستارى ءۇشىن تاعايىندالادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ولاردىڭ كىتاپتارى ادامزات بالاسىنىڭ كەڭ تىنىستى ەركىن ءومىرىنىڭ شارىقتاۋىنا جول اشۋىمەن قۇندى. بەدەلدى سىيلىقتى «Radius» جانە «Pegasus Brucke» حالىقارالىق ونەر ورتالىقتارى مەن 10 مەملەكەتتىڭ حالىقارالىق قوعامدىق ۇيىمدارى تاعايىنداعان.
«ول – تەك جازۋشى عانا ەمەس، ۇلكەن گۋمانيست. اتادان مۇرا بولىپ قالعان رۋحاني قۇندىلىقتارىمىزدى بۇگىنگى جاس ۇرپاققا جەتكىزىپ كەلەدى. ونىڭ ەڭبەكتەرىندە كوشپەلى وركەنيەتتەن وتىرىقشى مادەنيەتكە اۋىسقان تۇستاعى قيىندىقتار سۋرەتتەلەدى. تابيعاتقا دەگەن كوزقاراس، ادامداردىڭ اراسىنداعى قارىم-قاتىناس بەينەلەنەدى»، - دەيدى اعا وقىتۋشى نۇرجان قۇلىمجانوۆ.