485 مىڭ ەۋرو.
قازاقستاندىق تەننيسشىلەر رولان گارروس تۋرنيرىنەن وسىنشا تابىس تاپتى. پاريج قالاسىنداعى بايراقتى باسەكە ءالى جالعاسىپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.
ءبىراق ءقازىردىڭ وزىندە وتاندىق سپورتشىلار الاتىن سىياقى كولەمى بەلگىلى. ەڭ جوعارى كورسەتكىش يۋليا پۋتينسيەۆاعا تيەسىلى. ول 150 مىڭ ەۋرونى ەنشىلەدى. ويتكەنى يۋليا جەكەلەي سىندا ءۇشىنشى اينالىمعا دەيىن جەتتى. ال جۇپتىق سىندا رەسەيلىك كاميللا راحيموۆامەن بىرگە العاشقى اينالىمنان اسا المادى.
ەلەنا رىباكينا بولسا، 142 مىڭ ەۋرونى قالتاسىنا باسادى. ول دا بارلىق قارسىلاسىن ايقىن باسىمدىقپەن ۇتىپ، ءۇشىنشى اينالىمعا دەيىن جەتكەن. كەيىن سىرقاتتانىپ قالۋىنا بايلانىستى جارىس جولىنان شىعۋعا ءماجبۇر بولدى.
ەرلەر اراسىندا قازاقستاندىق الەكساندر بۋبليك 77 مىڭ، تيموفەي سكاتوۆ 69 مىڭ، ال الەكساندر نەدوۆەسوۆ پەن اندرەي گولۋبيەۆ، سايكەسىنشە، 21 جانە 8 مىڭ ەۋرودان الادى. بۇعان قوسا، اننا دانيلينانىڭ 16 مىڭ ەۋرو تاپقانى بەلگىلى بولدى. جەرلەستەرىمىزدىڭ جالپى تابىسىن تەڭگەگە شاققاندا 234 ميلليون تەڭگەنى قۇرايدى. رولان گارروس ءتۋرنيرى تەننيس بويىنشا جىلدىڭ باستى باسەكەلەرىنىڭ ءبىرى جانە ول 12ء-شى ماۋسىمعا دەيىن جالعاسادى. الەمدىك الاماننىڭ جالپى جۇلدە قورى 46 ميلليون 600 مىڭ ەۋرونى قۇرايدى.