الماتىنىڭ وقۋشىلار سارايىندا 60 مىڭنان استام وقۋشىنى ءبىر اي ىشىندە روبوتوتەحنيكانى، درونداردى باسقارۋعا ۇيرەتۋ جانە وزگە ۇيىرمەلەرگە قاتىسۋ قولجەتىمدى بولادى، دەپ حابارلايدى Almaty-akshamy.kz
وقۋشىلار سارايى بۇگىندە ءوز دامۋىنىڭ جاڭا كەزەڭىنە وتۋدە. الماتى اكىمدىگىنىڭ قولداۋىمەن جوبالىق كەڭسە اياسىندا وسىناۋ قوسىمشا ءبىلىم بەرۋ مەكەمەسى ءوز تاريحىندا اۋقىمدى مودەرنيزاسيالانۋدىڭ ەكى كەزەڭىن ىسكە اسىردى جانە ءوز قىزمەتىن كەڭەيتتى. نىساننىڭ الاڭى 35 مىڭ شارشى مەتردەن اسادى.
قالا وقۋشىلارى ءۇشىن زىمىران جاساۋ جانە اەروورتالىق، پلانەتاريي، VR جانە درونداردى باسقارۋ زەرتحاناسى، فيزيكا، حيميا، بيولوگيا جانە گيدروپونيكا بويىنشا عىلىمي زەرتحانالار، سونداي-اق روبوت جاساۋ، IT-باعدارلامالاۋ جانە باسقا دا ۇشىرۋ الاڭدارى بويىنشا ۇيىرمەلەر اشىلدى. سونداي-اق، سپورتتىق، كوركەمدىك، الەۋمەتتىك-پەداگوگيكالىق باعىتتاعى جاڭا ۇيىرمەلەر ىسكە قوسىلدى.
بۇل پايدالى ۇيىرمەلەر ەندى اپتاسىنا 15 مىڭنان استام الماتىلىق وقۋشىنى، ال كۇنىنە 3000 – عا جۋىق بالانى قابىلداي الادى. مودەرنيزاسيالانۋدان كەيىنگى وقۋشىلار سارايىنىڭ جوبالىق قۋاتى وسىنداي.
ايتا كەتەرلىگى، وقۋشىلار سارايى 1983 جىلى سالىنعان تاريحي ماڭىزى بار ساۋلەت نىسانى بولىپ تابىلادى.
2019 جىلى الماتى اكىمدىگىنىڭ قاۋلىسىنا سايكەس وقۋشىلار سارايىنا تۋريستەر مەن ناتۋراليستەر ستانسيالارى، №12 بالالار مۋزىكالىق مەكتەبى جانە №4 دجاز بالالار مۋزىكالىق مەكتەبى وزدەرىنىڭ ماتەريالدىق بازاسىمەن جانە قارجىلاندىرۋىمەن قوسىلدى.
وتكەن جىلى الماتى اكىمى ەربولات دوسايەۆتىڭ تاپسىرماسىمەن سكۆەردى اباتتاندىرۋ جۇمىستارى اياقتالدى. سىرتقى جارىقتاندىرۋ اۋىستىرىلدى، جاڭا اعاشتار مەن گۇلزارلار وتىرعىزىلدى، كوگالداندىرۋ جۇرگىزىلدى، سۋارۋ جۇيەسى تارتىلدى، جابىندىلار توسەلدى. سونداي-اق جاڭا ورىندىقتار مەن ۋرنالار ورناتىلىپ، سۋبۇرقاق سالىندى.