پارلامەنت ءماجىلىسىنىڭ دەپۋتاتى رينات زايىتوۆ الەۋمەتتىك جەلىدەگى پاراشاسىندا وزىنە جاسالىپ جاتقان شابۋىل جايلى جازبا قالدىردى، دەپ حابارلايدى Almaty-akshamy.kz.
دەپۋتاتتىڭ ايتۋىنشا، مۇنداي قىسىمدار وعان بۇعان دەيىن دە كورسەتىلگەن.
«كەيىنگى ەكى كۇندە ماعان قاراي ەكپىندى اقپاراتتىق جانە پسيحولوگيالىق شابۋىل باستالدى. ونى ءوزىم دە كۇتكەنمىن. سەبەبى، وعان ەتىم ۇيرەنگەن. مۇنداي شابۋىلدار ماعان 2008، 2011، 2019-ىنشى جىلدارى دا جاسالعان. جاسىرمايمىن وڭاي ەمەس. ءبىراق شىداۋعا تۋرا كەلەدى. ەندى سىزدەرگە بۇل تەحنولوگيا قالاي جاساقتالاتىنىن تۇسىندىرۋگە تىرىسايىن. مىسالى وسى جولعى شابۋىلدىڭ تاقىرىبى مەنىڭ ناماز وقىپ ءجۇرىپ الاياقتىق جاسايتىن ادامدار جايلى ايتقان ءسوزىمدى العا تارتىپ، سول ارقىلى قوعامدى ماعان قارسى قويماق. ماقساتى بەلگىلى. ءبىرىنشىسى- مەنى قورقىتۋ، ەكىنشىسى-مەنىڭ جەكە باسىما قاستاندىق جاسالسا، وسى سەبەپتەن ەكەن دەگىزۋ. ءسوز جوق اقىلدى ءجۇرىس. ەكەۋىنىڭ بىرەۋىنە جەتكەنشە ولاردىڭ توقتامايتىنىن دا بىلەمىن. تاۋەكەل. ماڭدايعا جازعانىن كورەمىز... بارىنە بىردەي ءبىر عانا جاۋابىم بار.
ءقادىرلى اعايىن، مەن دە وزدەرىڭىز سياقتى كوپ پەندەنىڭ ءبىرىمىن. ەشكىمنەن تىعىلىپ، ەشكىمنەن قاشىپ جۇرگەن جوقپىن. قانداي دا ءبىر ايتارلارىڭىز بولسا، جاۋابىن بەرۋگە دايىنمىن. بار ارمانىم ەلىمنىڭ دۇرىس ءومىر سۇرگەنىن، وتانىمنىڭ گۇلدەنگەنىن كورۋ عانا. ەشبىر توپتىڭ الدىندا تىزەرلەپ كەشىرىم سۇرامايمىن! ويتكەنى وعان سەبەپ كورىپ تۇرعان جوقپىن. الەۋمەتتىك جەلى شۋلادى ەكەن دەپ، دىرىلدەيتىن قورقاقتارىڭ مەن ەمەس. العا قويعان ناقتى ماقساتىممەن جوسپارىم بار. سول جۇمىستاردى ءبىتىرۋىم كەرەك. ءماجىلىس مىنبەرىنەن حالىققا بەرگەن انتىم بار. بەرىلگەن مەرزىم بەس جىل. سول بەس جىلىمدى حالىقتىڭ مۇددەسىن قورعاۋعا ارنايمىن. باسقاسى ءبىر جاراتقاننىڭ قۇزىرىندا.
تۇسىنەتىن شىعارسىزدار دەپ ويلايمىن.
P.S
ۆاتسابىما شىعىپ، قورقىتپاقشى بولىپ جاتقان باتىرسىماقتار.
سەندەردەن شوشىپ جۇرەتىن جاعدايىم جوق. اپتاسىنا بەس كۇن جۇمىسقا جاياۋ بارىپ، جاياۋ كەلەمىن. قىلاتىندارىڭدى قىلىپ الىڭدار. وققاعارىم دا، سەندەر ايتقان «براتۆام» دا جوق. سەنگەنىم ءبىر قۇداي»، - دەدى دەپۋتات جازباسىندا.