انا ءتىلى – ۇلتتىڭ بىردەن-بىر پاسپورتى.
ءوز تىلىنە ءوزى قوجا ادامدار كوبىنە-كوپ ۇندەمەيدى.
***
ۇلتتىڭ ءتىلى – ۇلتتىڭ ءدىلى.
***
بالىق ءتىلسىز بولسا دا،
حالىق ءتىلسىز بولمايدى.
***
ءوز ءتىلىڭ – بىرلىك ءۇشىن،
وزگە ءتىل – تىرلىك ءۇشىن.
***
وزگە تىلدە سايراۋ ءقاۋىپتى ەمەس،
وزگە تىلدە ويلاۋ ءقاۋىپتى.
***
ءتىلى قاتتى تاياق جەيدى،
ءتىلى ءتاتتى جايا جەيدى.
***
ءتىل ساباپ بەرەدى،
باس جاۋاپ بەرەدى.
***
ۇلىنىڭ ءتىلىن كەسسەڭ دە،
ۇلتتىڭ ءتىلىن كەسە المايسىڭ.
***
بايلىقتا ۇلت بولمايدى،
ۇلتتا تىلدەن اسقان بايلىق بولمايدى.
***
پۇلسىز بازار،
ءتىلسىز حالىق بولمايدى.
***
كوزگە سىيمايتىن تاۋ
سوزگە سىيادى.
***
ءتىلى ورالىمدى حالىقتىڭ
ويى دا ورالىمدى.
***
انا ءتىلىن ۇقپاعان –
ول جابايى تۇكتى ادام.
***
ءسوز بوستاندىعى دەگەن –
كومەيگە كەلگەن ءسوزدى
قانشا جۇتامىن دەسەڭ، سونشا جۇتۋ.
***
ءسوز جۇتۋ تاس جۇتۋدان اۋىر.
***
وي ىزدەپ جۇرگەندە سوزگە،
ءسوز ىزدەپ جۇرگەندە ويعا تاپ بولاسىڭ.
***
كەرەمەت دەگەن وي
قاراپايىم ءسوزدىڭ قاقپانىنا تۇسەدى.
***
يديومانى يديوتتار عانا بۇزادى.
***
ساياساتكەرلەر وزدەرىنىڭ كۇردەلى ويلارىن
قات-قابات سوزگە وراپ-وراپ جەتكىزەدى.
***
ءسوز سيقىرىنان اسقان سيقىر جوق.
***
ءبىر توننا قورعاسىننان
ءبىر مىسقال ءسوز اۋىر.
***
وي ءسوزدىڭ الدىندا كىرىپتار،
ايتسە دە ءسوز ويدىڭ ىعىنا جىعىلادى.
***
وي – كوڭىلدىڭ قۇلپى،
ورىندى ءسوز – كىلتى.
***
سۇلۋدىڭ سۇلۋى – ءسوز،
اشۋلانعاندا ونىڭ ءوڭى قاشادى.
***
ءتىل قان شىعارمايدى،
جانىڭدى شىعارادى.
***
ءتىل ولتىرەدى،
نە ءتاۋباڭا كەلتىرەدى.
***
ءتىلدىڭ ءجۇزى جوق، ءۇشى بار.
ودان ۇشىنعان
جامان ۇشىنار.
***
ءتىل دەگەنىڭ – ءسۇيۋ، قۇشۋ،
ماحاببات بوپ ءپىسۋ.
ەڭ باستىسى – ءتۇسىنىسۋ.
***
ءتىل – كۇردەلى ويدىڭ كىلتى.
***
ادامدى ادام قىلعان – ءتىل.
***
ءۇنسىز قالۋعا بولادى،
ءتىلسىز قالۋعا بولمايدى.
***
ءتىل يەسىنەن بۇرىن ولمەۋگە ءتيىس!
***
ءتىل – ويدىڭ قازىنالى قويماسى.
***
و، جاراتقان!
ءسوزدىڭ جاقسىسىن جەتكىز،
جامانىن سىنىڭنان وتكىز!
***
اسىرە قىزىل – كوركەمدىكتىڭ سورى.
***
ءسوز سابيدەن جالاڭاش،
جانە سونىسىمەن سۇيكىمدى.
***
ءسوزدىڭ باعاسىن تۇسىرمەي،
بۇلداي ءبىل!
ايتا بىلمەدىڭ ەكەن،
تىڭداي ءبىل!
***
ءسوز ۇزىلگەن جەردە اڭگىمە دە، دوستىق تا،
قارىم-قاتىناس تا – ءبارى دە ۇزىلەدى.
***
تۋىستىقتىڭ تامىرىندا دا ءتىل جاتادى.
***
ءتىلىن سۇيمەگەن، ءتىلىن سىيلاماعان ازامات –
تۋىس ەمەس – جات!
***
وي مەن ءتىلدىڭ تۇتاستىعى
ەت پەن تەرىنىڭ تۇتاستىعىنداي.
***
ءسوز – سەسپەي قاتىراتىن قارۋ.
***
ءسوزدىڭ بىرەۋ بىلمەيتىن عانا ەمەس،
ءوزى دە بىلمەيتىن ماعىناسى بار.
***
ماحاببات كوزدەن،
ۇعىنۋ – سوزدەن باستالادى.
***
ءسوز! قايران ءسوز!
مۇز جۇرەكتى ەرىتەدى.
تاس باۋىردى جىبىتەدى.
***
بەرگەن سەرت ولمەسە،
باستالعان ءىس ولمەيدى!
***
ءسوز – ويدىڭ جاڭعىرىعى.
***
قاتتى سوزدەن باس جارىلىپ،
ءتاتتى سوزدەن تاس بالقيدى.
***
دوس باسقا،
جاۋ باسقا.
ءسوز ايتىپ قايتەسىڭ
مەڭىرەۋ ماۋباسقا.
***
سويلەۋگە – ءسوز،
شايناۋعا – ساعىز...
***
جاقسى ءسوز جاۋدى قايتارادى،
جامان ءسوز ساۋدى ولتىرەدى.
***
اۋزىڭ قيسىق بولسا دا،
ءتىلىڭ ءتۇزۋ بولسىن.
***
قيسىق وتىرساڭ دا
تۋرا سويلە!
***
تۋرا ءسوز تۋعانىڭا دا جاقپايدى.
***
ءسوزى دۇرىستىڭ
ءوزى دۇرىس.
***
تۋرا ءسوز تەمىردى تەسەدى.
***
تىلمەن تۇيگەندى
تىسىڭمەن شەشە المايسىڭ.
***
الاقان قىشىسا – اقشا،
ءتىل قىشىسا – ءسوز.
***
سويلەي بىلمەگەن پەندەدەن،
ۇرە بىلگەن يت ارتىق.
***
ءسوزدىڭ جۇيەسىن تاپساڭ،
يەسىن دە تاباسىڭ.
***
تيىسكەنگە ءتىل قاتپا.
***
ايتا بىلگەن اۋىز
اللاسىمەن دە ءتىل تابادى.
***
ايتا بىلمەگەن اۋىزدان
تىڭداي بىلگەن قۇلاق ارتىق.
***
استىڭ ءدامى تۇزدان،
اقىلدىڭ ءدامى سوزدەن.
***
ءبىر ءسوز – ازداۋ،
ءبىر ءسوز كوپتەۋ...
***
مال كۇيىس قايىرادى،
مىلجىڭ دا سول...
***
ويناپ ايتساڭ دا،
ويلاپ ايت.
***
ازاماتتىڭ نەسى ارتىق،
اينىمايتىن ءسوزى ارتىق.
***
ۇزىن ءسوزدىڭ – قىسقاسى،
قىسقا ءسوزدىڭ – نۇسقاسى.
***
ءتىل – تيەكسىز،
قيال – جيەكسىز.
***
كوزدىڭ وتى بار،
ويىپ تۇسەدى.
ءتىلدىڭ ءجۇزى بار،
ءتىلىپ تۇسەدى.
***
ءتىل ۇزارعاندا،
بەت قىزارعاندا.
***
باستىڭ تۇبىنە ءتىل جەتەدى.
***
ءبىر اۋىزعا
ءبىر ءتىلدىڭ ءوزى
ارەڭ-ارەڭ سىيادى.
***
تۇرتسەڭ – كوز شىعادى،
شەرتسەڭ – ءسوز شىعادى.
***
جىلى جەر – قاردى،
جىلى ءسوز – جاردى ەرىتەدى.
جاقسى ءسوز قاي اۋىلدان شىقسا دا باعالى.
ءتۇسىنۋشىسىن دە، باعالاۋشىسىن دا تابادى.
***
ءتىل – ۋ، ءتىل – بال.
ءتىلسىز ادام – مال.
***
سۋدىڭ عانا ەمەس،
ءسوزدىڭ دە سۇراۋى بار.
***
جەل كوتەرىپ كەتەتىن سوزدە سالماق جوق.
***
ءسۇيسىنۋ – كوزدەن،
ءيسىنۋ – سوزدەن باستالادى.
***
ءسوزدىڭ وزىندە كىنا جوق. ماسەلە ايتۋشىدا.
بىرەۋ ونى مۇزعا اۋناتىپ،
بىرەۋ تۇزعا اۋناتىپ جەتكىزەدى.
ەندى بىرەۋ جۇرەگىنىڭ جىلۋىنا بولەپ جولدايدى.
***
ءتىل يەسىنەن بۇرىن ولمەۋگە ءتيىس!
***
اكىم ناشار سويلەسە،
اقىن ناشار سويلەسە،
انا تىلدە كىنا جوق.
***
توپتاستىراتىن دا – ءتىل،
وت باستىراتىن دا – ءتىل.
***
ءبىر اۋىزعا ءبىر ەمەس، بىرنەشە ءتىل سىيادى.
ءبىراق، سوعان انا ءتىلىن سىيعىزا الماساڭ،
قازاق بولماي-اق قوي!
***
ءبىزدىڭ كەيبىر بالالاردان
كوكەكتىڭ بالاپانى جاقسى.
ولار وزگە ۇيادا وسسە دە،
ءوز تىلدەرىندە قاقسايدى.
***
ءتىل قان شىعارماي-اق قانسىراتادى.
***
قان شىعاراتىن قانجاردان
قانسىراتاتىن ءتىل مىقتى.
***
جەبە جاي قۇر ەتتەن وتەدى،
ءسوز جۇرەكتەن وتەدى.
***
ۇرلىقتىڭ توركىنى تۇندە،
توبەلەستىڭ توركىنى تىلدە.
***
پىلدە تۇلىپ جوق،
تىلدە قۇلىپ جوق.
***
ماسەلە قانشا تىلدە كىسىنەسۋدە ەمەس،
ماسەلە – ءبىر تىلدە تۇسىنىسۋدە.
***
ەل سويلەسە ءبىر تىلدە،
سەن دە سويلە، ىركىلمە!
***
سۇيەكسىز ءتىل سۇيەگىڭدى سىندىرادى.
***
ءسوز سەمسەردەن بەتەر –
سەسپەي قاتىرادى.
***
اۋرۋ اۋىزدان كىرەدى،
ازاپ اۋىزدان شىعادى.
***
داۋدى ءتىل باستاپ، قارۋ اياقتايدى،
سوعىستى قارۋ باستاپ، ءتىل اياقتايدى.
***
ءتىل – ەلدىگىڭ،
بىرلىك – بەلدىگىڭ.
***
ءتىل – بىلىگىڭ،
بايگە بەرمەس كۇلىگىڭ.
***
ءتىل – ۇلتتىڭ سۇيەنەتىن تامىرى،
سيىناتىن ءتاڭىرى.
***
ۇلتتىڭ ءوشۋى ءتىلدىڭ وشۋىنەن باستالادى.
***
دىننەن بەزۋ – سۇمدىق،
تىلدەن بەزۋ – ودان دا بەتەر.
***
ءتىلدىڭ بەتىن ءتىل عانا قايىرادى.
***
ءتىلدى بىلمەيتىندەر ەمەس،
ءتىلىن بىلگىسى كەلمەيتىندەر قازاق ەمەس!
***
ءتىل بىرەۋلەرگە الداۋ ءۇشىن،
بىرەۋلەرگە اقتالۋ ءۇشىن كەرەك.
***
ءتىل ءوزى نە؟ اناتوميالىق اتاۋ ما؟
الدە سۋىق قارۋ ما؟
***
كەيبىر باسشىلاردىڭ انا ءتىلى – وتىرىك.
***
ءتىل – ءقادىرىڭ،
ءدىن – قاسيەتىڭ.
***
انا ءتىلىڭ الپىس تىلگە تاتيدى.
***
وگىز دە ءوز تىلىندە موڭىرەيدى،
قورسىلداعان قۇلىندى كورگەن جوقپىن.
***
انا ءتىلىڭ – اسىلىڭ،
ونى بىلمەگەن – ماسىلىڭ.
***
ادام اللاسىنا انا تىلىندە جالبارىنادى.
***
حالىق پاتشانىڭ تىلىندە ەمەس،
پاتشا حالىقتىڭ تىلىندە سويلەسىن!
***
ءدىنسىز ادام – كاپىر،
ءتىلسىز ادام – پاقىر.
***
انا ءتىلىم بولماسا، مىنا ءتىلىم بار دەمە،
انا تىلگە لايىق باسقا ءتىلدى بەرمەگەن.
***
ءاربىر حالىق ءوزىنىڭ انا تىلىندە عانا باقىتتى.
ءتىل – كەيدە قارۋ، كەيدە دارۋ.
***
قازاق ءتىلىنىڭ ۇلىلىعى سوندا:
بۇل تىلدە كەيبىر قازاقتاردىڭ وزدەرى دە
سويلەي المايدى.
***
انا تىلىندە سويلەمەسەڭ – قۇرىپ كەت!
يت بولىپ ءۇرىپ كەت!
***
دىنگە ادام كىرەدى.
سوندىقتان ودان شىعا الادى.
تىلگە ادام كىرمەيدى.
ەندەشە ودان قالاي شىعادى؟
***
ءتىلى شولاقتىڭ ويى شولاق.
***
كوزىڭ جەتپەگەن جەرگە ءسوزىڭ جەتەدى.
ءسوز وقتان ۇشقىر،
سۇڭگىدەن ۇشكىر.
***
جاقسى ءسوز – جان ءالديى.
اقىنبىز دەپ قۋانامىز،
شىن مانىندە دۋانامىز.
***
كوزدىڭ تيمەيتىنى جوق،
ءسوزدىڭ يمەيتىنى جوق.
***
كوزبەن ويناساڭ دا،
سوزبەن ويناما!
***
كەشەگى ءسوزدى كەشىر،
تاڭعى سوزبەن ءوشىر.
***
اقىل قالجىراسا،
ءسوز بىلجىرايدى.
ابايسىز ايتىلعان ءسوز –
تاسقا تۇسكەن جۇمىرتقا.
***
ءسوزدىڭ سالماعىن وي ولشەيدى.
***
تىلىڭمەن سويلە،
دىلىڭمەن قابىلدا.
***
ءتىل بالدان ءتاتتى،
ۋدان اششى.
***
تىلمەن سويعان قان شىعارماي سويادى.
***
وتتىڭ قىزۋىنا تاس بالقيدى،
ءسوزدىڭ قىزۋىنا تاسباۋىر بالقيدى.
***
ءتىلى جۇمساق مايدا ادام
تۋىسىنداي قايدا دا.
***
ءتىلدىڭ ۇشى جوق – تەسەدى.
ءجۇزى جوق – كەسەدى.
***
قالاي ويلاساڭ – سولاي سويلەيسىڭ.
***
كوڭىلدىڭ قۇلپىن ءتىل اشادى.
***
سوزدەن جۇرەك جارىلادى.
***
ءتىل – ءقاۋىپتى قارۋ.
***
ءوز تىلىندە سايرايدى تەك اقىنىڭ،
وزگە تىلدە شۇلدىرلەيدى ماقۇلىق.
***
ءدىنىن اۋىستىرعان حالىق – قاسقا حالىق،
ءتىلىن اۋىستىرعان – مۇلدە باسقا حالىق.
***
قاي ەلدە دە
تۇراقتى
بولۋ كەرەك ءبىر-اق ءتىل!
***
سوزگە سەمسەر توتەپ بەرە المايدى.
***
ءسوز سايگۇلىكتەن بۇرىن جەتەدى.
***
سەرت تە سوزدەن تۇرادى.
***
و دۇنيەدەگى ادامنىڭ ءوزى جەتپەسە دە، ءسوزى جەتەدى.
***
كەدەن تىلگە كولدەنەڭ تۇرا المايدى.
***
شەشەننىڭ دە ارعى اتاسى – ءتىل،
كوسەمنىڭ دە ارعى اتاسى – ءتىل.
***
ۇلتتىڭ ءتىلىن ۇيرەنۋ – مىندەت،
ادامنىڭ ءتىلىن ءبىلۋ – ۇلىلىق.
***
انا تىلىڭنەن ايىرعانشا
اۋزىڭداعى ءتىلدى كەسكەن دۇرىس.
***
كوزدىڭ قىزۋىنان اسقان ىستىق،
ءسوزدىڭ ىزعارىنان اسقان سۋىق جوق.
***
انا ءتىلىن قادىرلەمەيتىن ادام قاي ۇلتقا دا
پەرزەنت بوپ جارىتپايدى.
***
ءتۇسىنىسۋ – تىلدەن،
تىستەسپەيدى بىلگەن.
***
جىلاتاتىن دا – ءتىل،
جۇباتاتىن دا – ءتىل.
***
مۇزعا تايعاننىڭ – ەتىنە،
سوزگە تايعاننىڭ سۇيەگىنە تاڭبا تۇسەدى.
***
ايتۋشىنىڭ ءتىلى جىبەكتەي بولسا،
تىڭداۋشىنىڭ كوڭىلى ۇلەكتەي.
***
اقىلدىنى توقتاتقان ءسوز
اقىماقتى توقتاتا المايدى.
***
ساسىعان اۋىزدان بورسىعان ءسوز شىعادى.
***
ءتىل بولماسا،
ادام كوپ حايۋاننىڭ ءبىرى بولىپ قالار ەدى.
***
ەگەسپەگەن ادامنىڭ تاقىمىن قايدان بىلەسىڭ،
سويلەسپەگەن ادامنىڭ اقىلىن قايدان بىلەسىڭ؟
***
ءتىل – ءتىس ەمەس، ول ۇنەمى تازا بولۋعا ءتيىس.
***
تاسقا قاتتى بولعان ءلازىم،
تىلگە ءتاتتى بولعان ءلازىم.
***
كوپ سويلەگەن ءسۇرىنىپ تىنادى.
***
تىلدەس ادامداردىڭ ءوزارا تۇسىنىسپەۋى
اقىلعا سىيمايدى.
***
ءتىل – تەرەڭدەگىڭدى قايناتادى،
زەرەڭدەگىڭدى جايناتادى.
***
ويىننان شىققان ءورتتى ءسوزدىڭ سەلى وشىرەدى.
***
عاجايىپ قوي ءومىر، تەگى،
كەيدە ءسوز دە سەمىرتەدى.
***
ءتىلدى ءبىلىپ قانا قويۋ از،
سەن ونىڭ تابيعاتىن ءتۇسىن.
***
تۇيەتىن دە – ءتىل،
شەشەتىن دە – ءتىل.
***
فرانسۋزدى مەنسىنبەيدى پارسى،
قويان استە قاسقىر تىلىنە قارسى.
***
قاي تىلدە سويلەسەڭ،
سول تىلدە ويلايسىڭ.
قاي تىلدە ويلاساڭ،
سول ءتىلدىڭ جاناشىرىسىڭ.
***
تىلدەن تۇڭىلمە،
تاعدىرىڭ – تىلىڭدە.
***
قاي ەلدە تۇرساڭ – سول ەلدىڭ تىلىندە سويلە.
***
قانجار جۇرت جوق جەردە سويىپ سالسا،
ءتىل جۇرت الدىندا سويىپ سالادى.
***
كوپ ءتىلدى بىلگەن قور بولمايدى.
انا ءتىلىن بىلمەگەن زور بولمايدى.
***
ءوز تىلىندە سويلەي الماعاندار
وزگە تىلدە وتتايدى.
***
قانجار مايىسپايدى – سىنادى.
ءتىل سىنبايدى – مايىسادى.
جانە مايىسقان سايىن ءقاۋىپتى.
***
ءتىلدى تىستەۋگە بولادى.
كەسۋگە بولمايدى.
***
كۇن تيگەن ادام جازىلادى،
ءتىل تيگەن ادام جازىلمايدى.
***
ويى انىق ادامنىڭ ءتىلى
تايپالعان جورعا بولادى.
***
باس اۋرۋى تىلدەن.
***
ءتىلدى بايلايتىن دا – ىشىمدىك،
شەشەتىن دە – ىشىمدىك.
***
ءجۇزى قايتپايتىن ءبىر قارۋ بار،
ول – تۋرا ادامنىڭ ءتىلى.
***
ادامنىڭ اقىلى ءتىلى ارقىلى انىقتالادى.
***
رەنىش – ۇرىستىڭ باسى،
ءتىل تابىسۋ – اياعى.
***
انا ءتىلى – سويلەيتىن ءتىلىڭ عانا ەمەس،
ويلايتىن دا ءتىلىڭ.
***
ءسوز – اقىلدىڭ اۆتوپورترەتى.
***
ويدىڭ كىلتى – ورالىمدى ءتىل.
***
شاعىستىراتىن دا – ءتىل،
بىتىستىرەتىن دە – ءتىل.
***
كوڭىل جىرتىعىن ءسوز عانا جامايدى.
***
ءسوز سۇيەكتەن وتەدى،
ءتىل تۇبىڭە جەتەدى.
***
جاماندى – سويىل،
جاقسىنى – ءسوز ولتىرەدى.
***
ءتىلدى اقىلعا بايلاپ ۇستاماسا،
دۇنيەنى بۇلدىرەدى.
***
اقىلدىنىڭ ءتىلى – ءتىل،
اقىماقتىڭ ءتىلى – بالالايكا.
***
مارال مۇيىزىنەن،
ادام تىلىنەن ۇستالادى.
***
ادامنىڭ ءتىلى ەكى ءجۇزدى:
ءبىر تىلىنەن بال اعادى،
ءبىر تىلىنەن ۋ تامادى.
***
وڭباعان ءسوز وڭايدا تۇرادى.
***
ءتاتتى ءسوز – ۋدىڭ،
اششى ءسوز – دارۋدىڭ قىزمەتىن اتقارادى.
***
ۇلتتىڭ ۇرشىعى دا ۇلت تىلىندە زىرىلداۋعا ءتيىس.
***
ءتىل تابىسۋ ءۇشىن
بۇكىل الەم ءبىر تىلدە سويلەۋگە مىندەتتى ەمەس.
***
ءتىل ۇيرەنۋ ءبىر بولەك،
ءتىل تابىسۋ ءبىر بولەك.
***
تىلىڭە ساق بول،
دىنىڭە بەرىك بول.
***
ءتىل وتپەيتىن جەرگە تانك تە وتە المايدى.
***
كوپ ءتىل بىلگەن كومۋسىز قالمايدى.
***
ءتىل دەگەنىڭ بىزدەن ۇشكىر،
قۇستان ۇشقىر.
***
ءسوز ناركوزسىز سويادى،
قان شىعارماي قويادى.
***
ءسوزدى ءسوز توقتاتادى.
***
تەبىرەنگەن ءسوز تاس قورعاننىڭ
تەمىر قاقپاسىن اشادى.
***
ءسوز سەمسەردىڭ ءجۇزىن قايىرادى.
***
كىلتىن تاپپاساڭ، ءتىلىن تاپ،
ءتىل اشادى بارلىعىن.
***
ءۇش ادام سويلەسەدى،
ەكى ادام سىرلاسادى.
***
وي – جالاڭاش ءتان.
ءتىل سونىڭ ىشكويلەگى.
***
ءتىلدىڭ ۇشىنداعىنى ايتپا،
كوڭىلدىڭ تۇكپىرىندەگىنى ايت.
***
سۇيەكسىز ءتىل
ساي-سۇيەگىڭدى سىرقىراتادى.
***
بىلىمنەن تاياق جەمەيسىڭ،
تىلىڭنەن تاياق جەيسىڭ.
***
ساياساتتان سۇرىنسەڭ – مەرتىگەسىڭ،
تىلدەن سۇرىنسەڭ، ءوزىڭدى ءوزىڭ ولتىرەسىڭ.
***
ءسوز اۋىزدان شىققانشا
كوڭىلدە ابدەن قايناۋى كەرەك.
***
ءبىر ءسوز – از.
ەكى ءسوز – كوپ.
قوس ءسوز سودان شىقسا كەرەك.
***
ءتىلى قىسقانىڭ عۇمىرى ۇزىن.
***
ءتىلدىڭ زاردابىن باس تارتادى.
***
ءتىلىڭ تۇنىق بولسا،
ويىڭ انىق بولادى.
***
قاباعىنا قاراما، كوزىنە قارا.
اۋزىنا قاراما، سوزىنە قارا.
***
شەشەن سوزدەن شىلتەر توقيدى.