ءماجىلىس دەپۋتاتى رينات زايىت اقپارات جانە قوعامدىق دامۋ ۆيسە-مينيسترى قانات ىسقاقوۆكە كوركەم شىعارمالارداعى بەيپىل سوزدەرگە قاتىستى سۇراق جولادى، - دەپ حابارلايدى aqshamnews.kz ءتىلشىسى.
"ءبىر-اق نارسەنى بىلگىم كەلەدى. كوركەم شىعارما دەگەن بولادى. ءقازىر سىزدەر قىزدى-قىزدىمەن "انا-مىنانى توقتاتۋ كەرەك" دەپ جاتىرسىزدار. كەلىسەمىن، بوقتىق ايتۋعا بولمايدى. ءبىراق ەرتەڭ "ءبىر تۇندە 7-8 قىزدى الىپ قاشتىم" دەپ ءان ايتقان مەنىڭ جاسىمداعى جىگىتتەردى سوتتاپ جۇرمەيمىز بە؟ "ەگەر مەن شىن سۇيسەم، اسىل ەركەم، ەرتەڭ كەشكە جدايىن تۇر، قاشۋ وڭاي" دەگەن حالىق ءانى بار. مۇنداي ساراپتامانى كىم جاسايدى. قۇزىرەتى بار ادامدار ما؟ ولاردى ءبىز تانيمىز با؟ ەكىنشىدەن، كوركەم شىعارمالاردى قالاي قورعايسىزدار؟ ەرتەڭ فولكلورىمىزدان ايىرىلىپ قالىپ جۇرمەيىك"، - دەدى ول.
"ونداي اندەردى ايتۋ ءۇشىن يمان ءجۇسىپ بولۋىمىز كەرەك" دەپ ازىلدەدى ءماجىلىس ءتوراعاسى ەرلان قوشانوۆ.
اقپارات جانە قوعامدىق دامۋ ۆيسە-مينيسترى قانات ىسقاقوۆ ساراپتامانى كىم جۇرگىزەتىنىن ايتتى.
"ەڭ الدىمەن، بىزدە كونستيتۋسيا بويىنشا سەنزۋراعا تىيىم سالىنعان. ەكىنشىدەن، شىعارماشىلىق ەركىندىك زاڭعا قايشى بولماسا، ءبىز قولدايمىز. سوندىقتان ساراپتامانى قۇقىق قورعاۋ ورگاندارى وتكىزبەيدى، ونى ءبىزدىڭ شىعارماشىلىق توپ قارايدى. كوركەم شىعارمالارعا كەلسەك، سيۋجەت دەگەن نارسە بار. ونىڭ ءبارىن قارايمىز. ەگەر زاڭعا قارسى نارسەلەر كورىنسە، ونى رەجيسسەرگە ايتىپ، تۇزەتۋ جۇمىستارى عانا جۇرگىزىلەدى. ال بىلاي جاۋاپقا تارتۋ دەگەن جوق"، - دەدى ول.
ەسكە سالايىق، بۇعان دەيىن ەندى ءان ماتىنىندە زورلىق-زومبىلىققا نەمەسە الىپ قاشۋعا شاقىراتىن سوزدەرى بار تۋىندىنىڭ اۆتورى تەكسەرىلەتىنى ايتىلعان ەدى. ىشكى ىستەر مينيسترلىگى ونداي اندەردىڭ ءارقايسىنا قۇقىق تۇرعىسىنان باعا بەرۋگە دايىن.