سەزدىڭ نەگىزگى ميسسياسى - بىتىمگەرشىلىك قاعيداتىن ورنىقتىرۋ.
پارلامەنت سەناتىنىڭ ءتوراعاسى، سەزد حاتشىلىعىنىڭ باسشىسى ماۋلەن اشىمبايەۆ جۋرناليستەرگە بەرگەن سۇحباتىندا الەمدىك جانە ءداستۇرلى دىندەر ليدەرلەرىنىڭ VII سەزىن وتكىزۋدىڭ ماڭىزى جايلى ايتتى، دەپ حابارلايدى Almaty-akshamy.kz Egemen.kz سىلتەمە جاساپ.
ماۋلەن اشىمبايەۆتىڭ ايتۋىنشا، بۇكىل الەمدە ورىن الىپ وتىرعان گەوساياسي شيەلەنىس جاعدايىندا كەلىسسوزدەر ۇستەلىندە باس قوسۋدىڭ ءمانى ايتارلىقتاي ارتىپ وتىر. وسى ورايدا، ول مەملەكەتتەر اراسىنداعى ساياسي ىنتىماقتاستىقتىڭ دەڭگەيى تومەندەپ كەتكەنىن ەسكەرىپ، الەم بۇل سەزگە ورتاق مامىلەگە كەلۋگە جول اشاتىن قادام رەتىندە ۇلكەن ۇمىتپەن قاراپ وتىرعانىن جەتكىزدى.
«كەيبىر ماسەلەلەر ساياسي تۇرعىدان شەشىمىن تاپپاي جاتسا، قاراما-قايشىلىقتار كۇردەلەنە تۇسكەندە، ءدىني ۇيىمدار باسشىلارىنىڭ اراسىندا وسىنداي ديالوگتىڭ ماڭىزى ارتا تۇسەتىنىن بايقاپ وتىرمىز. الداعى سەزدە 100-دەن استام ب ا ق حابار تاراتادى. سوندىقتان بۇل فورۋم الەمدە ىنتىماقتاستىقتى دامىتۋعا، قاقتىعىستاردى ازايتۋعا، شيەلەنىستەردى جويۋعا ىقپال ەتەدى دەپ سەنەمىز»، - دەدى سەنات سپيكەرى.
ايتا كەتسەك، VII سەزگە 100-دەن استام رۋحاني، ءدىني كوشباسشىلار جانە حالىقارالىق ۇيىمداردىڭ باسشىلارى قاتىسادى دەپ كۇتىلۋدە. ولاردىڭ قاتارىندا ءال-ازحاردىڭ باس يمامى شەيح احمەد ات-تايەب، يۋدايزم، بۋدديزم، داوسيزم، سينتويزم جانە باسقا دا دىندەردىڭ ليدەرلەرى مەن وكىلدەرى بار. VII سەزدىڭ نەگىزگى ەرەكشەلىكتەرىنىڭ ءبىرى - ريم پاپاسى فرانسيسكتىڭ قاتىسۋى.
«ريم پاپاسىنىڭ قازاقستانعا ساپارى رۋحاني جانە ساياسي ماڭىزى زور وقيعا. ول ۇنەمى سوعىس، كەدەيشىلىك، گەندەرلىك تەڭسىزدىك سياقتى الەمدەگى ەڭ وزەكتى ماسەلەلەردى كوتەرىپ جۇرەدى. ريم پاپاسىنىڭ الەمدەگى ابىروي-بەدەلى دە وتە جوعارى ەكەنىن بىلەمىز. سوندىقتان ونىڭ سوزىنە بۇكىل الەم قۇلاق تۇرەدى. سول سەبەپتى ريم پاپاسىنىڭ قازاقستانعا كەلۋى ەلىمىزگە ينۆەستيسيا تارتۋعا، ءتۋريزمدى دامىتۋعا جانە مەملەكەتىمىزدىڭ حالىقارالىق ارەناداعى مارتەبەسىن كوتەرۋگە وڭ اسەرىن تيگىزەدى»، - دەدى ماۋلەن اشىمبايەۆ سۇحبات بارىسىندا.
سونداي-اق سەنات ءتوراعاسى سەزدى قارجىلاندىرۋ ماسەلەسىنە توقتالا كەتتى. ول بارلىق شىعىن الەمنىڭ باسقا ەلدەرىندەگىدەي قازاقستاننىڭ حالىقارالىق ءىس-شارالارعا جۇمسايتىن وكىلدىك شىعىستارى شەگىندە ەكەنىن ايتتى.
«بۇل جەردە اعىلىپ-توگىلىپ جاتقان قارجى جوق. بىرىنشىدەن، جىل سايىن رەسپۋبليكالىق بيۋدجەتتەن ەلدىڭ سىرتقى ساياسي باعىتىن ىسكە اسىرۋعا باعىتتالعان بەلگىلى ءبىر قاراجات بولىنەدى. بارلىق ءىس-شارالار وسى قارجىلاندىرۋ اياسىندا جۇزەگە اسىرىلادى. ەكىنشىدەن، قوناقتاردىڭ ءبىر بولىگى ءوز ەسەبىنەن كەلەدى. ۇشىنشىدەن، دەمەۋشىلىك كومەك تە قاراستىرىلعان. سونىمەن قاتار ءدىني ليدەرلەر ىسىراپشىلدىقتى قولدامايتىن جانە ونى قابىلدامايتىن وتە قاراپايىم ادامدار ەكەنىن ايتا كەتۋ كەرەك. سول سەبەپتى، ءبىز ايتارلىقتاي قاراجات جۇمساپ، ارتىق شىعىنعا ۇشىراپ جاتىرمىز دەۋگە ەش نەگىز جوق»، - دەدى ماۋلەن اشىمبايەۆ.
سەنات ءتوراعاسىنىڭ ايتۋىنشا، سەزدىڭ نەگىزگى ميسسياسى - بىتىمگەرشىلىك قاعيداتىن ورنىقتىرۋ.