ريددەر قالاسىنداعى جىلۋ ەلەكتر ورتالىعىندا بولعان توتەنشە جاعدايعا بايلانىستى جەدەل شتاب قۇرىلدى. وبلىس اكىمدىگىنىڭ مالىمەتىنشە، ماسەلە ايماق باسشىسى دانيال احمەتوۆتىڭ جەكە باقىلاۋىندا.
شىعىس قازاقستان وبلىسىنىڭ پروكۋراتۋراسى ريددەردەگى جىلۋ ەلەكتر ورتالىعىنىڭ باسشىلىعىنا قاتىستى تەكسەرۋدى باستادى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.
"شقو پروكۋراتۋراسى جىلۋ ەلەكتر ورتالىعىنىڭ باسشىلىعىنا قاتىستى تەكسەرۋدى باستادى. حالىقتىڭ الاڭداۋىنا ەش نەگىز جوق. ورتالىق قازاندىقتارىن ىسكە قوسۋ الگوريتمى ازىرلەنگەن"، - دەلىنگەن اقپاراتتا.
كەشە ريددەردەگى جىلۋ ەلەكتر ورتالىعىندا قازاندىقتار جۇمىسىن توقتاتىپ، تۇرعىندار جۇلۋسىز قالعانىن ەسكە سالامىز. ورتالىقتاعى توتەنشە جاعداي ساپاسىز مازۋت سالدارىنان بولعانى انىقتالدى. جەو باسشىلىعىنىڭ سالعىرتتىعىنان مازۋتقا سۋ قوسىلىپ كەتكەن.