استانادا تاەكۆوندودان قازاقستان رەسپۋبليكاسىنىڭ VI جازعى سپارتاكياداسى اياقتالدى.
جارىس جاقسىلىق ۇشكەمپىروۆ اتىنداعى جەكپە-جەك سارايىندا 2-4 جەلتوقسان ارالىعىندا ءوتتى، دەپ حابارلايدى اlmaty-akshamy.kz.
ءۇش كۇن بويى ەلىمىزدىڭ تۇكپىر-تۇكپىرىنەن 179 مىقتى سپورتشى مەدالدار ءۇشىن جارىستى. جارىسقا 113 ەر ادام مەن 76 ايەل قاتىستى، ولاردىڭ اراسىندا حانچجوۋداعى جازعى ازيا ويىندارىنىڭ قولا جۇلدەگەرى سمايىل دۇيسەباي، ريو-2016، توكيو-2020 وليمپيادا ويىندارىنىڭ قاتىسۋشىسى جانە حالىقارالىق تۋرنيرلەردىڭ بىرنەشە دۇركىن جەڭىمپازى رۋسلان جاپاروۆ، چەندۋدەگى دۇنيەجۇزىلىك جازعى ۋنيۆەرسيادانىڭ چەمپيونى ريتا باكيشيەۆا،قۇراما كوشباسشىلارى جانە حالىقارالىق تۋرنيرلەردىڭ بىرنەشە دۇركىن جەڭىمپازدارى بوتاگوز قاپانوۆا، نۇربەك گازەز، نۇراي حۋساينوۆا جانە تاعى باسقالار بار. بايراقتى باسەكەدە وتاندىق سپورتشىلارىمىز 16 سالماق دارەجەسىندە ونەر كورسەتىپ، ءوزارا كىم مىقتىنى انىقتادى. تۋريزم جانە سپورت ءمينيسترى ەرمەك مارجىقپايەۆ جارىستىڭ فينالدىق جەكپە-جەكتەرىن تاماشالاپ، جەڭىمپازدار مەن جۇلدەگەرلەردى ماراپاتتادى.
«تاەكۆوندودان ەلوردادا ۇيىمداستىرىلعان رەسپۋبليكالىق سپارتاكيادا باسەكەسى اياقتالدى. جارىستىڭ سوڭعى كۇنىندەگى فينالدىق جەكپە-جەكتەر تارتىستى ءوتتى. ەلىمىزدىڭ ايماقتارىنان كەلگەن سپورت شەبەرلەرى ءوزارا كۇش سىناسىپ، جانكۇيەرلەرگە ءوز شەبەرلىگىن پاش ەتتى. جارىس بارىسىندا تورەشىلەر ءادىل جۇمىس ىستەگەنىن، ال ەل سپارتاكياداسى جوعارى دەڭگەيدە ۇيىمداستىرىلعانىن اتاپ وتكەن ءجون. سپورتشىلارىمىزدى جارقىن جەڭىستەرىمەن شىن جۇرەكتەن قۇتتىقتايمىن. ەندىگى كەزەكتە، نامىستى قولدان بەرمەي، الەمدىك سايىستا ۇزدىكتەر قاتارىنان كورىنۋىنە تىلەكتەسپىن»، - دەپ اتاپ ءوتتى ەرمەك مارجىقپايەۆ.