الماتىدا 22 جاستاعى جىگىت تانىسىنان جارتى ميلليون تەڭگە بوپسالاعان.
اقشانى الۋ ءۇشىن ازامات قارۋمەن قورقىتىپ، سەندىرۋ ءۇشىن ودان وق اتقان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«جاقىندا بىزگە 23 جاستاعى جەرگىلىكتى تۇرعىن ارىزبەن كەلىپ، ءوزىن قامقور جىگىت رەتىندە كورسەتكەن جاڭا تانىسى قىزدىڭ ۇيىنە كەلىپ، تراۆماتيكالىق تاپانشامەن قورقىتىپ، 500 مىڭ تەڭگە تالاپ ەتىپ، بوپسالاعان. ايتپەسە ونى جانە ءسىڭلىسىن وڭدىرمايتىنىنا ۋادە بەرگەن. قىز ونداي اقشانىڭ جوقتىعىن ايتقان. سول كەزدە ازامات ونى تەلەفونىن لومباردقا وتكىزۋگە ماجبۇرلەگەن. قارسىلىققا جاۋاپ رەتىندە ول پاتەردىڭ ەدەنىنە ءبىر رەت وق اتقان. ت.ەسىمدى ازامات قورىققاننان تانىسىنىڭ تالاپتارىن ورىنداپ، وعان لومبارد بەرگەن 235 مىڭ تەڭگەنى تابىستاعان. بويجەتكەن 2،5 اپتادان كەيىن پوليسياعا كومەك سۇراپ جۇگىنگەن. كەشە كەشكە كۇدىكتى ەقكب-داعى ارىپتەستەرى مەن پاترۋلدىك پوليسيا قىزمەتكەرلەرىنىڭ كومەگىمەن ۇستالدى. ونىڭ قاسىندا بىرنەشە ەر ادام بولعان، ولاردىڭ جەكە باسىنىڭ زاڭسىز ارەكەتتەرگە قاتىسى بار-جوعى مىندەتتى تۇردە تەكسەرىلەتىن بولادى»، – دەدى ناۋرىزباي اۋداندىق پوليسيا باسقارماسىنىڭ باستىعى ديدار جاقىپبايەۆ.
كۇدىكتى 22 جاستاعى ا.ەسىمدى ازاماتتىڭ ارەكەتى ق ر قك-نىڭ 194 بابى (بوپسالاۋ) بويىنشا سارالانعان. ول پد ۋاقىتشا ۇستاۋ يزولياتورىنا قامالدى.
ق ر قك-نىڭ 201 بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77 بابى 3ء-بولىمى، 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.