باقىلاۋشىلار 11 ۇيىم مەن 25 مەملەكەتتەن كەلدى. بايقاۋشىلاردى ەلىمىزدىڭ سىرتقى ىستەر ءمينيسترى مەن ورتالىق رەفەرەندۋم كوميسسياسىنىڭ ءتوراعاسى شاقىرتقان، دەپ حابارلايدى almaty-akshamy.kz
اتا زاڭ – ەلىمىزدىڭ مىزعىماس تىرەگى. ءبىراق مەملەكەت پەن حالىقتىڭ بەرىكتىگى ءۇشىن كونستيتۋسيا باپتارىن زامانعا لايىقتاپ وتىرۋ ءلازىم. مىنە، اراعا 27 جىل سالىپ، رەسپۋبليكالىق رەفەندۋم وتكىزىپ جاتىرمىز. ەل اۋماعىنداعى 10 مىڭنان استام ۋچاسكەدە ناۋقاننىڭ ءادىل ءارى اشىق ءوتۋىن حالىقارالىق بايقاۋشىلار باقىلايدى.
بايقاۋشىلاردى تىركەۋ رەفەرەندۋمعا 5 كۇن قالعاندا، ياعني 30 مامىردا اياقتالدى. ولاردىڭ اراسىندا تۇركى مەملەكەتتەرى ۇيىمىنىڭ وكىلدەرى، تمد پارلامەنتارالىق اسسامبلەياسىنىڭ مۇشەلەرى بار. سوڭعىسى ەلىمىزدەگى ساياسي ناۋقانعا 15ء-ىنشى رەت قاتىسىپ جاتىر.
جوبا دايىن. رەفەرەندۋمعا حالىقتىڭ 50 پروسەنتتەن استامى قاتىسىپ، قولداۋ بىلدىرسە، كونستيتۋسيانىڭ 3-تەن ءبىر بولىگى، ياعني 33 باپقا 56 وزگەرتۋ ەنگىزىلەدى. دەمەك تاجىريبەلى حالىقارالىق بايقاۋشىلارعا ارتىلعان جاۋاپكەرشىلىك زور.
– ق ر كونستيتۋسياسىنا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋمعا 25 شەت مەملەكەتتەن جانە 11 حالىقارالىق ۇيىمنان 272 بايقاۋشى قاتىساتىن بولدى. حالىقارالىق بايقاۋشىلاردىڭ قاتىسۋى ناۋقاننىڭ اشىقتىعى مەن جاريالىلىعىنا، مەملەكەت پەن حالىقارالىق مىندەتتەمەلەردى ساقتاۋىنا ىقپال ەتەتىنىن تاعى دا اتاپ وتكىم كەلەدى، - دەيدى ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ