سايلاۋ ۋچاسكەسىنە تاڭعى ساعات 7-دە العاشقىلاردىڭ ءبىرى بولىپ الماتى قالاسىنىڭ اكىمى ەربولات دوسايەۆ ايەلىمەن بىرگە كەلدى. ولار مانشۇك مامەتوۆا اتىنداعى №28 مەكتەپ-ليسەيدە ورنالاسقان №358 سايلاۋ ۋچاسكەسىندە داۋىس بەردى.
«بۇگىن ءبىزدىڭ مەملەكەتىمىز ءۇشىن جانە ونىڭ ازاماتى رەتىندە مەن ءۇشىن وتە ماڭىزدى كۇن بۇگىن ەلىمىز ءوزىنىڭ بولاشاعىن ايقىندايدى. مەن سايلاۋ ۋچاسكەسىنە ەلىمىزدىڭ بولاشاعى، مەملەكەتتىڭ بەيبىتشىلىگى مەن گۇلدەنۋى، الماتى مەن قالا تۇرعىندارىنىڭ بىرلىك-بەرەكەسى ءۇشىن داۋىس بەرۋگە كەلدىم»، – دەدى ەربولات دوسايەۆ.
الماتىدا تاڭعى ساعات 7-دە 574 سايلاۋ ۋچاسكەلەرى اشىلدى. 1،1 ميلليوننان استام قالا تۇرعىندارىنىڭ داۋىس بەرۋ قۇقىعى بار.
ەسكە سالساق، رەفەرەندۋمعا «2022 جىلعى 6 مامىردا بۇقارالىق اقپارات قۇرالدارىندا جاريالانعان «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىندا باياندالعان قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلاردى قابىلدايسىز با؟» دەگەن سۇراق قويىلدى.