24 جانە 25 شىلدەدە جامبىل مەن الماتى وبلىستارىنداعى رەسپۋبليكالىق ماڭىزى بار اۆتوجولداردا ەكى ءىرى جول-كولىك وقيعاسى تىركەلدى، دەپ حابارلايدى Aqshamnews.kz "قازاۆتوجول" ۇلتتىق كومپانياسىنىڭ مالىمەتىنە سىلتەمە جاساپ.
24 شىلدەدە تاڭعى 09:40 شاماسىندا جامبىل وبلىسى، مويىنقۇم اۋدانىنداعى قاشقانتەڭىز ستانسياسى ماڭىندا ورنالاسقان "استانا – قاراعاندى – الماتى" اۆتوجولىنىڭ 451-شاقىرىمىندا Toyota Alphard ماركالى كولىك جۇك تيەيتىن ەكسكاۆاتور كولىگىمەن سوقتىعىستى. الدىن الا مالىمەتكە سايكەس، جۇرگىزۋشى جىلدامدىق پەن اراقاشىقتىقتى ساقتاماعان. اپات سالدارىنان ءتورت ادام قازا تاۋىپ، تاعى ەكى ادام جاراقات العان.
25 شىلدەدە ساعات 10:15-تە، الماتى وبلىسى، جامبىل اۋدانى، سامسى اۋىلى ماڭىنداعى KAZ-06 اۆتوجولىنىڭ 81+500 شاقىرىمىندا ءدال وسى ماركاداعى كولىك تراكتورمەن سوقتىعىستى. جول جوندەۋ جۇمىستارى ءجۇرىپ جاتقان ۋچاسكەگە زاڭسىز كىرىپ كەتكەن كولىك جۇرگىزۋشىسى بەلگىلەنگەن جىلدامدىقتى اسىرعانى جانە جول ەرەجەسىن بۇزعانى ايتىلدى. وقيعا سالدارىنان التى ادام كوز جۇمدى. ونىڭ ءبىرى جول جۇمىسشىسى بولعان. تاعى ەكى ادام جاراقات العان.
ەسكە سالايىق، 5 شىلدەدە قاراعاندى وبلىسى، اقشاتاۋ كەنتى ماڭىندا دا قايعىلى جول اپاتى بولعان ەدى. Kia Sedona كولىگىنىڭ جۇرگىزۋشىسى جول ەرەجەسىن ساقتاماي، جوندەۋ ءجۇرىپ جاتقان اۋماققا كىرىپ كەتىپ، قورشاۋعا سوعىلعان. سونىڭ سالدارىنان كولىك ورتەنىپ، جەتى ادام وقيعا ورنىندا مەرت بولدى.