وڭىرلەردى دامىتۋعا 7 ترلن تەڭگەدەن استام قارجى بولىنگەن.
ءماجىلىس دەپۋتاتتارى ۇلتتىق قوردان 2024-2026 جىلدارعا ارنالعان كەپىلدەندىرىلگەن ترانسفەرت پەن 2024-2026 جىلدارعا ارنالعان رەسپۋبليكالىق بيۋدجەت تۋرالى زاڭدى قابىلدادى، دەپ حابارلايدى Almaty-akshamy.kz پارلامەنت پالاتاسىنىڭ باسپا ءسوز قىزمەتىنە سىلتەمە جاساپ.
وتىرىس بارىسىندا پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ "2024-2026 جىلدارعا ارنالعان رەسپۋبليكالىق بيۋدجەت تۋرالى" زاڭ جوباسىن ۇسىندى.
ونىڭ ايتۋىنشا، 2024 جىلعا ارنالعان تۇسىمدەر 20،4 ترلن تەڭگە دەڭگەيىندە بولجانۋدا. بيۋدجەت تاپشىلىعى جالپى ىشكى ونىمگە شاققاندا 2،6% دەڭگەيىندە بولجانىپ وتىر. جالپى بيۋدجەتتىڭ 2024 جىلعا ارنالعان شىعىندار بيىلمەن سالىستىرعاندا 1،5 ترلن تەڭگەگە ۇلعايىپ، شامامەن 24 ترلن تەڭگەنى قۇراعان.
جالپى رەسپۋبليكالىق بيۋدجەتتىڭ باسىم بولىگى مەملەكەتتىك جانە الەۋمەتتىك مىندەتتەمەلەردى تولىققاندى ورىنداۋعا جانە وڭىرلەردى دامىتۋعا باعىتتالعان. سونىمەن، يندەكستەۋدى ەسەپكە العاندا 5،4 ترلن تەڭگە زەينەتاقى مەن جاردەماقى تولەۋگە كەتسە، 2،4 ترلن تەڭگە دەنساۋلىق ساقتاۋ جۇيەسىن دامىتۋعا، ونىڭ ىشىندە "اۋىل شارۋاشىلىعىن جاڭعىرتۋ" ۇلتتىق جوباسىن ىسكە اسىرۋعا جۇمسالادى. ءبىلىم سالاسىن دامىتۋعا، اتاپ ايتقاندا، "جايلى مەكتەپ" ۇلتتىق جوباسىن جۇزەگە اسىرۋعا 1،7 ترلن تەڭگە بولىنەدى.
سونداي-اق، ەرۇلان جاماۋبايەۆ وڭىرلەردى دامىتۋ شىعىندارىنا دا توقتالدى. بۇل ماقساتتارعا 7 ترلن تەڭگەدەن استام قارجى بولىنگەن.
حالىقتىڭ تابىسىن ارتتىرۋ باعدارلاماسى اياسىندا ازاماتتاردى جۇمىسپەن قامتۋعا 3،5 ترلن تەڭگە ءبولۋ جوسپارلانعان. ونىڭ ىشىندە 2،5 ترلن تەڭگە 1،5 ميلليوننان استام جۇمىسشىنىڭ جالاقىسىن ارتتىرۋعا قاراستىرىلعان.
ەكونوميكانىڭ ناقتى سەكتورىن دامىتۋعا 2،8 ترلن تەڭگە قاراستىرىلادى. اتاپ ايتقاندا، وڭدەۋ ونەركاسىبىن دامىتۋ، كاسىپكەرلىكتى قولداۋ جانە باسقا دا باسىم مىندەتتەردى جۇزەگە اسىرۋ جوسپارلانۋدا.
كۇش قۇرىلىمدارىنىڭ شىعىندارى 2،6 ترلن تەڭگەنى قۇرادى.
ۇلتتىق ەكونوميكا ءمينيسترى الىبەك قۋانتىروۆ ۇلتتىق قوردىڭ ۆاليۋتالىق اكتيۆتەرى 2024 جىلى 68 ملرد اقش دوللارىن قۇراپ، 2025-2026 جىلدارى 80،7-93،3 ملرد اقش دوللارىنا دەيىن وسەدى دەپ بولجانىپ وتىرعانىن اتاپ ءوتتى.