بۇل ناۋقان قازان ايىنىڭ باسىندا اياقتالادى.
قازان ايىنىڭ باسىندا قازاقستاندىق شارۋالار استىق جيناۋ ناۋقانىن اياقتايدى، بۇل تۋرالى اۋىل شارۋاشىلىعى مينيسترلىگىنىڭ ماماندارى ايتتى، دەپ حابارلايدى Almaty-akshamy.kz.
«17 قىركۇيەكتەگى جاعداي بويىنشا، 14،1 ملن گەكتار ەگىس القابىنداعى ءداندى جانە ءداندى-بۇرشاقتى داقىل جينالدى. ورتاشا ونىمدىلىك گەكتارىنا 9،2 سەنتنەردەن اينالدى. بۇل 2020 جىلعى دەڭگەيدەن 22،8%-عا تومەن (وتكەن جىلدىڭ سايكەس كەزەڭىندە ورتاشا ونىمدىلىك گەكتارىنا 11،9 سەنتنەردەن اينالدى). ءدال بۇگىنگى كۇنگە دەيىن جالپى 13 ملن توننا استىق جينالدى، ونىڭ 10،4 ملن تونناسى بيداي»، – دەلىنگەن اۋىل شارۋاشىلىعى مينيسترلىگىنىڭ باسپا ءسوز قىزمەتىنىڭ حابارلاماسىندا.
بيدايدان وزگە ماماندار 197،8 مىڭ توننا مايلى داقىل، 2 142،7 مىڭ توننا كارتوپ، 3 730،1 مىڭ توننا كوكونىس داقىلدارى، 2 581،3 مىڭ توننا باقشا داقىلدارىن جيناپ العان.
ەگىن ەگەتىن نەگىزگى ءۇش ءوڭىر – اقمولا، قوستاناي جانە سولتۇستىك قازاقستان وبلىستارىندا 10،6 ملن گەكتار ەگىس القابى جينالعان.بۇل جالپى الاڭنىڭ 91،4%-ى. ورتاشا ونىمدىلىك گەكتارىنا 8،4 سەنتنەردى قۇراپ، 8،9 ملن توننا ءونىم جينالعان.
«استىقتىڭ جالپى ءتۇسىمى 15،3 ملن تونناعا جەتەدى دەگەن بولجام بار. سونىڭ ىشىندە بيدايدىڭ ءتۇسىمى 10،5 ملن تونناعا جۋىقتاۋى مۇمكىن. ق ر ۇلتتىق ستاتيستيكا بيۋروسىنىڭ دەرەكتەرىنە سايكەس، 2021 جىلدىڭ 1 تامىزىنداعى جاعداي بويىنشا رەسپۋبليكادا ءداندى جانە ءداندى-بۇرشاقتى داقىلدار 3،5 ملن توننا، ونىڭ ىشىندە بيداي 2،8 ملن توننا بولعان. وتكەن جىلدان قالعان استىقتى ەسەپتەگەندە شامامەن 18،8 ملن توننا استىق بار. ونىڭ 13،3 ملن تونناسى بيداي»، – دەپ حابارلايدى ماماندار.
رەسمي مالىمەت بويىنشا، ەگىن جيناۋ جۇمىستارىن ۋاقىتىلى اتقارۋ ءۇشىن فەرمەرلەرگە 396،5 مىڭ توننا جەڭىلدەتىلگەن ديزەل وتىنى ءبولىندى. 2021 جىلدىڭ 16 قىركۇيەگىندەگى جاعداي بويىنشا 247،5 مىڭ توننا (62%) جەتكىزىلدى. مۇناي وڭدەۋ زاۋىتىنداعى وتىننىڭ ءليترى 156 تەڭگە (تونناسى 189،0 مىڭ تەڭگە)، وپەراتورلاردىڭ جەتكىزۋ قىزمەتىنىڭ قۇنىن قوسا ەسەپتەگەندە دە ديزەل وتىنىنىڭ وڭىرلەردەگى ورتاشا باعاسى قىمبات ەمەس. شارۋالار ديزەل وتىنىنىڭ ءبىر ءليترىن 177 تەڭگەدەن الادى.
رەسپۋبليكادا سىيىمدىلىعى 28،8 ملن توننا استىق ساقتايتىن مۇمكىندىك بار. ونىڭ ىشىندە استىق قابىلداۋ كاسىپورىندارىندا 12 ملن توننا، فەرمەرلەردە 16،8 ملن توننا استىق ساقتايتىن ورىن بار.
بيىلعى ەگىن جيناۋ ناۋقانى شتاتتىق رەجيمدە جانە جوسپارلانعان كەستەگە سايكەس ءجۇرىپ جاتىر. جۇمىستى ۋاقىتىندا اتقارۋعا قاتىستى بارلىق ماسەلەلەر اۋىل شارۋاشىلىعى مينيسترلىگىنىڭ تۇراقتى باقىلاۋىندا. ءتيىستى مونيتورينگ پەن تالداۋ جاسالىپ وتىرادى.