التى ازاماتقا «جەتىسۋ وبلىسىنىڭ قۇرمەتتى ازاماتى» اتاعى بەرىلدى
بۇگىن تالدىقورعان قالاسىنىڭ ب.ريموۆا اتىنداعى دراما تەاترىندا رەسپۋبليكا كۇنىنە ارنالعان سالتاناتتى جيىن ءوتتى. مەرەكەلىك جيىندا وبلىس اكىمى بەيبىت يسابايەۆتىڭ قولىنان قىرىق جەتىسۋلىق ازامات مەملەكەتتىك ناگرادالار مەن ەل جانە وبلىس دەڭگەيىندەگى قۇرمەتتى اتاقتار الدى. ولاردىڭ قاتارىندا كورنەكتى كومپوزيتور، ەڭبەك ارداگەرى مۇراتحان ەگىنبايەۆ، بەلگىلى ايتىس اقىنى ايتاقىن بۇلعاقوۆ، عارىشكەر، حالىق قاھارمانى ايدىن ايىمبەتوۆ جانە باسقا دا ازاماتتار بار. رەسپۋبليكا كۇنىنە وراي استانادا جانە تالدىقورعاندا جالپى سانى 45 ازامات ماراپاتقا يە بولدى، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
جينالعان جۇرتشىلىقتى قۇتتىقتاعان وبلىس اكىمى بەيبىت يسابايەۆ مەرەكەلىك كۇنتىزبەگە قايتا قوسىلعان رەسپۋبليكا كۇنىنىڭ ەل تاۋەلسىزدىگى تاريحىنداعى ماڭىزىنا توقتالدى.
- مەملەكەت باسشىسى قاسىم-جومارت كەمەل ۇلى توقايەۆ ەلىمىزدىڭ باستى مەرەكەسى رەتىندە رەسپۋبليكا كۇنىن قايتا قالپىنا كەلتىرۋدى ۇسىنعان بولاتىن. بۇل باستاما قوعام تاراپىنان قىزۋ قولداۋ تاپتى. «ەگەمەندىك تۋرالى» دەكلاراسيا قابىلدانعان 1990 جىلعى 25 قازاندا تاۋەلسىزدىگىمىزدىڭ العىشارتى جاسالدى، بەتكە الار باعىتىمىز ايقىندالدى. بۇل كۇن ءبىز ءۇشىن سونىسىمەن قۇندى. قازاقستان – ءبىزدىڭ ءومىر ءسۇرىپ وتىرعان ورتاق وتانىمىز. سوندىقتان ونىڭ تاعدىرى، بۇگىنى مەن بولاشاعى ەلدىڭ ءاربىر ازاماتىنا تىكەلەي قاتىستى، - دەدى ب.يسابايەۆ.
وبلىس اكىمى ءوز سوزىندە ادىلەتتىلىك ءپرينسيپىن ۇستانعان جاڭا قازاقستاننىڭ العاشقى قادامى مەملەكەتتىك باسقارۋ جۇيەسىندەگى، قوعامدىق-ساياسي قۇرىلىمداعى تۇبەگەيلى وزگەرىستەردەن باستالىپ وتىرعانىنا توقتالدى.
- بۇل تۋرالى كۇنى كەشە وبلىسىمىزعا ارنايى جۇمىس ساپارىمەن كەلگەن پرەزيدەنت قاسىم-جومارت توقايەۆتىڭ ءوزى جۇرتشىلىقپەن كەزدەسۋىندە اتاپ ءوتتى. جەتىسۋ وبلىسىن دامىتۋدىڭ ماڭىزدى باسىم باعىتتارىن ايقىنداپ، ناقتى تاپسىرمالار بەردى. جاڭا وبلىسىمىزعا بۇدان بىلاي دا قارجىلاي قولداۋ كورسەتىلەتىنىن ايتتى. الداعى ۋاقىتتا بۇكىل ەل بولىپ، بەرەكە-بىرلىگىمىزدى تانىتىپ، تاۋەلسىزدىگىمىزدىڭ تۇعىرلى، بولاشاعىمىزدىڭ بەكەم بولۋىنا بىركىسىدەي اتسالىسا بەرەمىز دەپ سەنەمىن. رەسپۋبليكا كۇنى مەرەكەسى قۇتتى بولسىن! ەلىمىزگە تىنىشتىق، حالقىمىزعا باق-بەرەكە، ءار شاڭىراققا تولايىم تابىس، يگىلىكتى عۇمىر تىلەيمىن! – دەدى ءوز قۇتتىقتاۋىندا بەيبىت يسابايەۆ.
مۇنان سوڭ وبلىس اكىمى ءوڭىردىڭ دامۋىنا زور ۇلەس قوسقان ءبىرقاتار جەتىسۋلىق ازاماتتى «قۇرمەت»، «ەڭبەك داڭقى» ءىىى دارەجەلى وردەندەرىمەن، «ەرەن ەڭبەگى ءۇشىن»، «شاپاعات» مەدالدارىمەن، قازاقستان رەسپۋبليكاسىنىڭ قۇرمەت گراموتاسىمەن ماراپاتتاپ، «قازاقستاننىڭ ەڭبەك سىڭىرگەن قايراتكەرى»، «جەتىسۋدىڭ قۇرمەتتى ازاماتى» اتاقتارىن بەردى. ماراپات العانداردىڭ اراسىندا «التىناي» مەملەكەتتىك حالىق بي ءانسامبلىنىڭ كوركەمدىك جەتەكشىسى گۇلميرا سماعۇلوۆا، الاكول اۋدانىنداعى «ەر-اسىل» شارۋا قوجالىعىنىڭ ءتوراعاسى ەرىك جۋانىشبايەۆ، بەلگىلى كومپوزيتور، حالىقارالىق جانە قازاقستان كومپوزيتورلار وداقتارىنىڭ مۇشەسى مۇراتحان ەگىنبايەۆ، «تالدىقورعان كوركەيتۋ» ج ش س كوگالداندىرۋ شەبەرى مۇحتار ايتىبايەۆ، «Koksu S&M Company» ج ش س جۇمىسشىسى ەربول توقتاعۇلوۆ، بەلگىلى ايتىسكەر اقىن، «الاتاۋ» قوعامدىق-ساياسي گازەتىنىڭ باس رەداكتورى ايتاقىن بۇلعاقوۆ، ەسكەلدىلىك كاسىپكەر وكسانا ۆلاسەنكو، «زەكەت» قايىرىمدىلىق قورىنىڭ وكىلى قانات ەگىزوۆ، سارقان اۋداندىق ورتالىق اۋرۋحاناسىنىڭ مەدبيكەسى نادەجدا ميحايلوۆا، كەربۇلاق اۋدانىنداعى ج.توباياقوۆ اتىنداعى ورتا مەكتەپتىڭ ءمۇعالىمى ءجاميلا شويىمبەكوۆا جانە باسقا دا تۇرعىندار بار.
سول سياقتى التى ازاماتقا «جەتىسۋ وبلىسىنىڭ قۇرمەتتى ازاماتى» اتاعى بەرىلدى. اتاپ ايتقاندا، ەڭبەك ارداگەرى، قسرو «قۇرمەت بەلگىسى»، «حالىقتار دوستىعى» وردەندەرىنىڭ، سول سياقتى قازاقستاننىڭ «قۇرمەت»، «پاراسات» وردەندەرىنىڭ يەگەرى اسىلمۇرات تۇرعانبەكوۆ، قازاقستان رەسپۋبليكاسىنىڭ عارىشكەرى، حالىق قاھارمانى ايدىن ايىمبەتوۆ، «ەرنار» شارۋا قوجالىعىنىڭ باسشىسى، «قۇرمەت» وردەنىنىڭ يەگەرى، مەسەنات تاسقىن جاپارقۇل، ەڭبەك ارداگەرى، ق ر ءبىلىم بەرۋ ءىسىنىڭ قۇرمەتتى قىزمەتكەرى اناتوليي الەكساندروۆيچ رۋدەر، گرەك-ريم كۇرەسى فەدەراسياسىنىڭ قۇرمەتتى پرەزيدەنتى، «بارىس» وردەنىنىڭ ءۇش بىردەي دارەجەسىنىڭ يەگەرى، مەسەنات ساۋات مىڭبايەۆ، مەملەكەت جانە قوعام قايراتكەرى، ەڭبەك ارداگەرى، «قۇرمەت» وردەنىنىڭ يەگەرى جومارتقالي جەكسەنبينوۆ العاشقىلاردىڭ ءبىرى بولىپ «جەتىسۋ وبلىسىنىڭ قۇرمەتتى ازاماتى» اتاندى.