ەرتەڭ رەسپۋبليكا كۇنىنە وراي الماتى تورىندە ورنالاسقان قازاق مەملەكەتتىك سيركىندە ەلىمىزگە بەلگىلى سيرك ءارتيسى كارىم مۇتىرعانوۆتىڭ بەنەفيسى وتەدى.
مەرەيلى 70 جاسقا تولىپ وتىرعان ارتيست 50 جىلىن سيرك ونەرىنە ارناعان. تاۋەلسىز قازاقستان داڭقىن الەمنىڭ 30-دان استام مەملەكەتىنە دارىپتەگەن.
كەيىنگى 10 جىلدا ول سيرك ارەناسىنا شىقپاعان بولاتىن. سوندىقتان ەلىمىزدەگى ەڭ تانىمال سيرك اۋلەتىنىڭ نەگىزىن قالاۋشى، رەجيسسەر، ۇستاز، «مۋتۋرگانچيكي» تريوسىنىڭ پروديۋسەرى كارىم مۇتىرعانوۆ ءۇشىن ەرتەڭ مەرەيلى كۇن. ول ءوزى، ۇلى جانە نەمەرەسى قاتىساتىن بەنەفيستىڭ جاقسى وتەتىنىنە سەنەدى.
— كارىم مۇتىرعانوۆ ءۇشىن الماتى سيركى ءوزىنىڭ ەكىنشى ءۇيى ىسپەتتى. ول ونەردەگى جولىن ءدال وسى وردادا باستاعان. كارىم مۇتىرعانوۆ بەنەفيسىندە بۇكىل الەم كورەرمەندەرىنە ۇناعان ەڭ جاقسى رەپريزالارى مەن ەرەكشە نومىرلەرىن كورسەتەتىن بولادى. سونداي-اق شوۋعا ەلىمىزدىڭ ءار ءتۇرلى قالالارىنىڭ ارتيستەرى مەن ج.ەلەبەكوۆ اتىنداعى رەسپۋبليكالىق ەسترادا-سيرك كوللەدجىنىڭ ستۋدەنتتەرى قاتىسادى. ال بۇل ءوز كەزەگىندە جاس مامانداردىڭ سيرك بيىگىندە جۇلدىزداي جارقىراۋىنا جول اشادى دەپ بىلەمىن، — دەيدى مۇرات مۇتىرعانوۆ.
وسى ورايدا ايتا كەتسەك، كارىم مۇتىرعانوۆتىڭ ۇلى مۇرات مۇتىرعانوۆ "رەكوردتار كىتابىنا" ەنىپ، "الەمدەگى ەڭ جاس كلوۋن" دارەجەسىن يەلەنگەن.
ءبىز بۇگىن ەرتەڭگى بەنەفيسكە اتسالىساتىن جاس ارتيستەردىڭ، ستۋدەنتتەردىڭ دايىندىعىن تاماشالادىق. ولاردىڭ كوزىنەن ونەرگە دەگەن قۇرمەتتى، جاسقا ءتان جالىندى كوردىك. كارىم مۇتىرعانوۆ ءىزباسارلارىنا ساتتىلىك تىلەدى.