رەسپۋبليكا كۇنىنە وراي «ءبىر ەل» جاستارى اتتى شارا ءوتتى.
رەسپۋبليكا كۇنىنە ورايلاستىرىلعان شارانىڭ العاشقى كۇنىندە ءار وڭىردەن جيىلعان 200-گە جۋىق ستۋدەنت جاستار قاسيەتتى ءوڭىردىڭ تاريحي ورىندارىنا ساياحات جاسادى، دەپ حابارلايدى Almaty-akshamy.kz.
قازاقستان حالقى اسسامبلەياسىنىڭ ەلىمىزدە تۇراتىن ەتنوستاردى ءبىرتۇتاس ۇلتقا توپتاستىرۋ مەن مادەنيەتارالىق ديالوگتى دامىتۋدى مۇرات ەتكەن «ءبىر ەل» جاستار جوباسى ۇلىتاۋ تورىنەن باستالدى.
التىن وردا مەن قازاق حاندارى وردا تىككەن مەكەندەردى ارالادى. ال بۇگىن جەزقازعان قالاسىندا جوبانىڭ پلەنارلىق وتىرىسى ءوتىپ، جاستار كوشپەلى ەكسكۋرسيادا كوڭىلگە تۇيگەندەرىن ورتاعا سالىپ، پىكىر الماستى. ءۇش كۇنگە جوسپارلانعان جوبا اياسىندا بۇدان بولەك شەبەرلىك ساباقتارى مەن ترەنينگتەر، موتيۆاسيالىق كەزدەسۋلەر دە وتەدى. ءتۇرلى ەتنوس وكىلدەرىنىڭ قۇرالعان كوڭىلدى تاپقىرلار كوماندالارى «دوستىق كۋبوگىن» ساراپقا سالادى.
«وسىلاي «ءبىر ەل» جوباسىنا قاتىسامىز دەپ كەلگەن ەدىك. كەشەگى كۇننەن ەستەلىكتەر وتە كوپ. الاشاحان كەسەنەسىنە جانە جوشى حان كەسەنەسىنە باردىق. وتە كەرەمەت جەرلەر ەكەن»، - دەيدى قاتىسۋشى ەكاتەرينا پودگورنوۆا.
«قازاقستاننىڭ بارلىق وڭىرىنەن جاستارىمىز كەلدى. 14 ەتنوس وكىلدەرى قاتىسىپ جاتىر. ولاردىڭ اربىرەۋى قازاق ءتىلىن مەڭگەرگەن، تۇسىنەدى، بىلەدى. تاريحتى بىلۋگە، ونى تانىتۋعا كەيىن وزدەرىنىڭ بارعان سوڭ ەلدەرىنە، جەرلەرىنە ايتۋعا نيەتتى جاستارىمىز قاتىسىپ جاتىر»، - دەيدى «قوعامدىق كەلىسىم» رمم ديرەكتورىنىڭ ورىنباسارى نۇرحات وراش.