الماتى قالاسىنىڭ قىلمىستىق اتقارۋ جۇيەسى دەپارتامەنتى قاراستى №11 مەكەمەدە جازاسىن وتەۋشى جاسوسپىرىمدەر تاربيە ءبولىمى قىزمەتكەرلەرىمەن بىرلەسە وتىرىپ، رەسپۋبليكا كۇنى قۇرمەتىنە «جاساي بەر، جايناي بەر، تاۋەلسىز قازاقستانىم!» دەگەن تاقىرىپتا كەزدەسۋ وتكىزدى.
كەزدەسۋگە جامبىل اتىنداعى قالالىق جاسوسپىرىمدەر كىتاپحاناسىنىڭ قىزمەتكەرى ش.قۇماروۆا ارنايى كەلىپ، قولداۋ كورسەتتى. باس بوستاندىعىنان ايىرىلىپ، جازاسىن وتەپ جاتقان جاسوسپىرىمدەر ەل، جەر، وتان، وتباسى تۋرالى سەزىمىن ولەڭ شۋماقتارى ارقىلى جەتكىزدى.
ولارعا ەلىمىزدىڭ تاريحىنداعى ەلەۋلى وقيعالار ۆيكتورينالىق سۇراق رەتىندە قويىلىپ، ناتيجەسىندە بالالاردىڭ تانىمدىق ءوي-ورىسى كەڭەيدى دەۋگە بولادى. سۇراق-جاۋاپ تانىمدىق ويىنىنا بەلسەندى قاتىسقان جاستارعا كىتاپتار مەن ەستەلىك سىيلىقتار تابىستالدى.
ءىس-شارا كىتاپحاناشىلار دايىنداعان كىتاپ كورمەسىمەن تۇيىندەلدى. ال بەلسەندى قاتىسقان جازاسىن وتەۋشى جاسوپىرىمدەر «ماقتاۋ قاعازبەن» ماراپاتتالدى. مۇنداي ءىس-شارالار جاستاردىڭ بويىندا وتانسۇيگىشتىك سەزىمدى قالىپتاستىرىپ، ومىرگە دەگەن وڭ كوزقاراس پەن بولاشاققا دەگەن سەنىمدى نىعايتادى دەيدى مەكەمە ماماندارى.