#رەسپۋبليكا كۇنى. الماتىدا قازاقستاننىڭ ەڭ ۇلكەن تۋى جەلبىرەدى

كاسىبي ءپاراشيۋتشى ولەگ توششيەۆ ۇشاقتان پاراشيۋتپەن سەكىرۋ كەزىندە كولەمى 800 شارشى مەتر بولاتىن قازاقستاننىڭ ەڭ ۇلكەن تۋىن اۋەدە اشتى.

ول قازاقستان رەكوردتار كىتابىنا ەندى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

رەسپۋبليكا كۇنىنە ارنالعان «اشىق اسپان» اكسياسى ىلە الاتاۋى تاۋلارى اياسىندا، الماتى وبلىسىنىڭ اۋماعىندا ءوتتى.

«تۋدىڭ كولەمى - 800 شارشى مەتر. بۇل تۋ استانانىڭ باستى فلاگشتوگىندا (450 شارشى مەتر) ورناتىلعان تۋدان ەكى ەسە ۇلكەن. ول وتە قىسقا مەرزىمدە - ەكى اپتا ىشىندە وسى بىرەگەي وقيعا ءۇشىن ارنايى جاسالدى. بۇل ءىس-شارا اسپاندا اشىلعان ق ر ەڭ ۇلكەن تۋى رەتىندە قازاقستاننىڭ رەكوردتار كىتابىنا ەنەدى. سەكىرۋدىڭ بيىكتىگى 3000 مەتردى قۇرايدى. بۇل ەڭ تانىمال شىمبۇلاق تاۋ شاڭعىسى كۋرورتىنىڭ دەڭگەيىنەن جوعارى»، - دەدى ءىس-شارانى ۇيىمداستىرۋشىلاردىڭ ءبىرى تىلەك كانالين.

ۇيىمداستىرۋشىلار اكسيانىڭ ماقساتى قازاقستاندىقتاردىڭ پاتريوتتىق رۋحىن نىعايتۋ، سونداي-اق، ەتنوسقا قاراماستان، بىر-بىرىنە دەگەن تولەرانتتى قاتىناستى ساقتاۋ ەكەنىن ايتتى.

«تۋ - ءبارىمىزدى بىرىكتىرەتىن مەملەكەتتىك ءرامىز، بۇل ءبىزدىڭ تاۋەلسىزدىگىمىزدىڭ سيمۆولى. ءبىز ءوز تۋىمىزعا قۇرمەتپەن قاراۋدى، مەملەكەتىمىزگە دەگەن پاتريوتتىق سەزىمدى نىعايتۋدى قالايمىز»، - دەپ اتاپ ءوتتى تىلەك كانالين.