قازاقستان رەسپۋبليكاسىنىڭ جاڭا كونستيتۋسياسى جوباسىندا شەتەلدىكتەرگە جەر ساتۋعا تىيىم الىنىپ تاستالدى دەگەن اقپارات شىندىققا جاناسپايدى، دەپ حابارلايدى Aqshamnews.kz.
جالعان اقپاراتقا قارسى ءىس-قيمىل ورتالىعى اتالعان مالىمەتتىڭ جالعان ەكەنىن مالىمدەپ، بۇل دەرەك فاكتىلەردى ادەيى بۇرمالاۋ ارقىلى تاراتىلىپ جاتقانىن اتاپ ءوتتى.
ورتالىقتىڭ تۇسىندىرۋىنشە، قولدانىستاعى كونستيتۋسيانىڭ 6-بابىنىڭ 3-تارماعىنداعى جەر جانە تابيعي رەسۋرستارعا قاتىستى نورما جاڭا كونستيتۋسيا جوباسىندا دا ەش وزگەرىسسىز ساقتالعان. اتالعان تالاپتاردىڭ وزگەرمەيتىنى كونستيتۋسيالىق رەفورما جونىندەگى كوميسسيا تاراپىنان دا راستالعان.
سونىمەن قاتار جاڭا كونستيتۋسيا جوباسىندا مەملەكەتتىڭ ەگەمەندىگى، ۋنيتارلىعى مەن اۋماقتىق تۇتاستىعى كونستيتۋسيالىق قۇرىلىستىڭ نەگىزدەرى رەتىندە باستاپقى تاراۋلاردا ناقتى بەكىتىلگەن. اتاپ ايتقاندا، 2026 جىلعى 30 قاڭتارداعى جوباعا سايكەس، قازاقستان رەسپۋبليكاسىنىڭ اۋماعى بولىنبەيدى جانە وعان قول سۇعىلمايدى، ال مەملەكەتتىڭ باسقارۋ ۇلگىسى مەن تۇتاستىعى وزگەرمەيدى.
وسىعان بايلانىستى ورتالىق شەتەلدىكتەرگە جەر ساتۋعا تىيىم سالۋ كۇشىن جويدى دەگەن مالىمدەمەلەردىڭ قۇقىقتىق نەگىزى جوق ەكەنىن اتاپ ءوتتى. ۆەدومستۆو ازاماتتار مەن بۇقارالىق اقپارات قۇرالدارىن اقپاراتتى تەك رەسمي دەرەككوزدەردەن تەكسەرۋگە جانە مانيپۋلياسيالىق مالىمەتتەردى تاراتپاۋعا شاقىردى.