بلوگەرلەر ەربولات جانابىلوۆ پەن ەلميرا تولەگەنوۆاعا بايلانىستى تەرگەۋ اياسىندا قوسىمشا، اۋىر قىلمىستىق باپتار تىركەلگەن، دەپ حابارلايدى Aqshamnews.kz.
بۇل تۋرالى بلوگەرلەر وتباسىنىڭ ادۆوكاتى جاسۇلان راحىمعالييەۆ مالىمدەدى. ونىڭ ايتۋىنشا، ەرلى-زايىپتىلاردىڭ ارەكەتى قىلمىستىق كودەكستىڭ 214-بابىنىڭ 2-بولىگى جانە 218-بابىنىڭ 2-بولىگى بويىنشا سارالانىپ وتىر. ادۆوكاتتىڭ مالىمەتىنشە، اسىرەسە 218-باپ، قىلمىستىق جولمەن الىنعان اقشا مەن مۇلىكتى زاڭداستىرۋ دەرەگى بويىنشا قوزعالعان ءىس اسا اۋىر ساناتقا جاتادى جانە ول 7 جىلعا دەيىن باس بوستاندىعىنان ايىرۋ جازاسىن كوزدەيدى.
ونىڭ ايتۋىنشا، تەرگەۋ ورگاندارى الەۋمەتتىك جەلىلەر ارقىلى جينالعان قاراجاتتى زاڭسىز كاسىپكەرلىك ناتيجەسىندە الىنعان كىرىس دەپ باعالاپ، ونى «زاڭداستىرۋ» بەلگىلەرىن انىقتاعان. سونىمەن قاتار، ءىس ماتەريالدارىندا پروكۋرور تاراپىنان مەملەكەت مۇددەسىنە قاتىستى تالاپ-ارىز تىركەلگەن. وندا ازاماتتاردان جينالعان قاراجاتتى مەملەكەت كىرىسى رەتىندە ءوندىرىپ الۋ ماسەلەسى كوتەرىلىپ وتىر.
قازىرگى ۋاقىتتا بلوگەرلەرگە قاتىستى بۇلتارتپاۋ شاراسى قارالۋدا. راحىمعالييەۆتىڭ ايتۋىنشا، ازىرگە ناقتى قانداي شارا قولدانىلاتىنى بەلگىسىز.
ايتا كەتەيىك، بۇعان دەيىن، 15 قىركۇيەكتە استانانىڭ مامانداندىرىلعان اۋدانارالىق سوتى ەربولات جانابىلوۆ پەن ەلميرا تولەگەنوۆانى ليسەنزياسىز لوتەرەيا ۇيىمداستىرعانى ءۇشىن اكىمشىلىك جاۋاپكەرشىلىككە تارتقان. تەرگەۋ دەرەكتەرىنە سايكەس، ولار الەۋمەتتىك جەلىلەردە اقشا، اۆتوكولىك جانە وزگە دە باعالى سىيلىقتار تىگىلگەن ۇتىس ويىندارىن تۇراقتى تۇردە وتكىزگەن.
سوت شەشىمىنەن كەيىن ءىستىڭ ماتەريالدارى قارجىلىق مونيتورينگ اگەنتتىگىنە جولدانىپ، قارجى وپەراسيالارىنا قاتىستى قوسىمشا تەكسەرىس باستالعان.