رەسەيمەن شەكارا ماڭى ىنتىماقتاستىعى قارىشتاپ دامىپ كەلەدى

ىنتىماقتاستىق ارتۋدا

قازاقستان مەن رەسەيدىڭ شەكارا ماڭى ىنتىماقتاستىعى قارقىندى دامۋدا، دەپ حابارلايدى Almaty-akshamy.kz. Qazaqtv.com cايتىنا سىلتەمە جاساپ.

پاندەمياعا قاراماستان، استراحان وبلىسىمەن تاۋار اينالىمى بيىلعى جىلدىڭ العاشقى جارتىسىندا 8 ملن 200 مىڭ دوللارعا جەتكەن. ايماقتا قازاقستاندىق كومپانيالاردىڭ قاتىسۋىمەن 34 كاسىپورىن جۇمىس ىستەيدى.

استارحان قالاسىندا قازاقستاننىڭ باس كونسۋلدىعىنىڭ اشىلۋى وسى بايلانىستاردى تەرەڭدەتۋگە مۇمكىندىك بەرەدى.

بۇل الەۋەت وسى كۇزدە كوكشەتاۋدا وتەتىن ايماقارالىق ىنتىماقتاستىق فورۋمىندا قاراستىرىلماق. وندا تۋريزم سالاسىنداعى جوبالارعا نازار اۋدارىلماق.

«اقتاۋدا تۋريستىك ايماق پەن قوناقۇيلەردى دامىتۋ ءۇشىن كوپ شارا قولعا الىنىپ جاتقانىن بىلەسىزدەر. شاھار رەسەيلىك تۋريستەردى قۇشاق جايا قارسى الۋعا دايىن. جۋىق ارادا «پەتر ۆەليكيي» تۋريستىك لاينەرىنىڭ قۇرىلىسى اياقتالادى. ول كاسپيي تەڭىزىندە ءار ەلدىڭ پورتىنا قاتىنايتىن بولادى»، - دەدى قازاقستاننىڭ رەسەيدەگى توتەنشە جانە وكىلەتتى ەلشىسى ەرمەك كوشەربايەۆ.

استراحان وبلىسىنىڭ گۋبەرناتورى يگور بابۋشكيننىڭ سوزىنشە، ەكىجاقتى  قارىم-قاتىناس جىل سايىن ارتۋدا ەكەن.

«قازاقستان مەن استراحان وبلىسى اراسىنداعى قارىم-قاتىناس جىل سايىن ارتىپ، ەكى اراداعى تاۋار اينالىمى دا ءوسىپ كەلەدى. الداعى ۋاقىتتا دا وسى ءۇردىستى جالعاستىرۋعا نيەتتىمىز. ءبىز ارىپتەستەرىمىزبەن ءتۇرلى سالاداعى ىنتىماقتاستىق بولاشاعىن تالقىلادىق. بۇعان ونەركاسىپ، ءوندىرىس جانە اۋىل شارۋاشىلىعى، تۋريزم مەن مادەني الماسۋ كىرەدى»، - دەدى ول.