قازاقستاندا بيىلعى ناۋرىز ايىندا جەكە سايكەستەندىرۋ ءنومىرىن العان رەسەيلىكتەردىڭ سانى بىلتىرعى وسى كەزەڭمەن سالىستىرعاندا 14 ەسەگە ارتقان، دەپ حابارلايدى اlmaty-akshamy.kz.
ق ر ىشكى ىستەر مينيسترلىگىنىڭ حابارلاۋىنشا، وتكەن جىلى رەسەيدىڭ 14 717 ازاماتى جسن العان. ال 2022 جىلدىڭ العاشقى ءۇش ايىندا 12 840 رەسەيلىككە جسن بەرىلگەن.
«قازاقستاندا تىركەلگەن رەسەيلىكتەر سانى 2022 جىلعى ناۋرىزدا وسە ءتۇستى. ءبىر اي ىشىندە 10 995 رەسەي ازاماتى جسن العان. ال 2021 جىلعى ناۋرىزدا 783 ادام العان، سالىستىرمالى تۇردە ءوسىم 14 ەسەدەن اسادى»، - دەلىنگەن حابارلامادا.
ۆەدومستۆو ۋكراينا ازاماتتارىنا قاتىستى بۇل سان ايتارلىقتاي كوپ ەمەس ەكەنىن جەتكىزدى. 2021 جىلى قازاقستاندا 1 087 ۋكراينالىق جسن السا، بيىل بۇل كورسەتكىش از عانا وسكەن. قاڭتاردا 42 ۋكراينالىق جسن العان، اقپاندا - 80، ال ناۋرىزدا - 198 ادام.
ايتا كەتەيىك، شەتەلدىكتەرگە قازاقستان ءجسن-ى بانكتەن شوت اشۋ كەزىندە، قازاقستاندا ورنالاسقان كوزدەردەن تابىس الاردا، سالىق سالىناتىن مۇلىكتى، مىسالى، اۆتوكولىك ساتىپ الاردا كەرەك. سونىمەن قاتار قازاقستان رەزيدەنتى - زاڭدى تۇلعانىڭ باسشىسى نەمەسە رەزيدەنت ەمەس - زاڭدى تۇلعا فيليالىنىڭ باسشىسى بولىپ تاعايىندالعاندا قاجەت.
شەتەل ازاماتتارىنا جسن الۋ ءۇشىن قازاقستاندا بولۋ مىندەتتى ەمەس. ونى سەنىمحات نەگىزىندە دە جاساۋعا بولادى.