ماسكەۋدەگى قازاقستان ەلشىلىگىندە رەسەيلىك عالىم ۆيكتور كوزودويدىڭ "اليحان بۋكەيحانوۆ. چەلوۆەك-ەپوحا" ("ءاليحان بوكەيحانوۆ. اڭىز ادام") كىتابىنىڭ تۇساۋكەسەرى ءوتتى.
اۆتور ءوز ەڭبەگىندە دەرەككوزدەردى، ماتەريالدار مەن فاكتىلەردى، سونىڭ ىشىندە بۇرىن عىلىمي اينالىمدا پايدالانىلماعان مۇراعات قۇجاتتارىن، ەستەلىكتەردى، سول جىلدارداعى گازەت-جۋرنال بەتتەرىندەگى جاريالانىمداردى پايدالانعان، دەپ حابارلايدى Almaty-akshamy.kz.
جيىندى اشقان قازاقستاننىڭ رەسەيدەگى ەلشىسى ەرمەك كوشەربايەۆ بۇل كىتاپتى ءاليحان بوكەيحانوۆ تۇلعاسىنىڭ العاشقى تەرەڭ جانە تۇتاس عىلىمي زەرتتەۋى دەپ باعالادى. تاريحي ادىلەتتىلىكتى قالپىنا كەلتىرۋ جانە قالىڭ بۇقاراعا اقپارات بەرۋ اياسىندا الاش قوزعالىسى قىزمەتىنىڭ كوپتەگەن قىرلارى اشىلماعانىن ەسكە سالدى. وسىعان بايلانىستى، بۇل كىتاپ قازاقستاننىڭ تاۋەلسىزدىگىن بولجاعان تاريحي وقيعالاردى زەرتتەۋگە ەلەۋلى ۇلەس قوستى.
جيناق اۆتورىنىڭ پىكىرىنشە، ءاليحان بوكەيحانوۆتى قازاقستاننىڭ عانا ەمەس، رەسەيدىڭ دە تاريحي قايراتكەرى دەپ ساناۋعا بولادى، ويتكەنى ول مەملەكەتتىك دۋماعا سايلاندى، بۇكىلرەسەيلىك ۇيىمداردىڭ جۇمىسىنا جانە بۇكىلرەسەيلىك ماسەلەلەردى شەشۋگە قاتىستى.
سونداي-اق ۆيكتور كوزودوي كىتاپتىڭ قازاق تىلىنە اۋدارىلعانىن ايتىپ، جاقىن ارادا ونىڭ جارىق كورۋىنە ءۇمىت ءبىلدىردى.