بۇل - سىرتقى ىستەر ءمينيسترى مۇحتار تىلەۋبەردىنىڭ پىكىرى.
قازاقستاننىڭ سىرتقى ىستەر ءمينيسترى مۇحتار تىلەۋبەردى جاپوندىق NHK تەلەارناسىنا بەرگەن سۇحباتىندا رەسەيگە قارسى سانكسيالار قازاقستان ەكونوميكاسىنا دا كەرى اسەرىن تيگىزىپ جاتقانىن ايتتى، دەپ حابارلايدى Almaty-akshamy.kz.
«رەسەي مەن قازاقستاندى تىعىز ەكونوميكالىق قاتىناستار بايلانىستىرادى. رەسەيگە قارسى سانكسيالار قازاقستان ەكونوميكاسىنا دا كەرى اسەرىن تيگىزەدى. ءبىز رەسەيگە قارسى سانكسيالارعا قوسىلمايمىز، ءبىراق سونىمەن بىرگە رەسپۋبليكا ەكونوميكاسىن ءارتۇرلى كاسىپورىندار شەكتەۋ شارالارىن اينالىپ ءوتۋ ءۇشىن پايدالانبايدى دەگەن قاعيدانى ۇستانامىز»،- دەدى سىرتقى ىستەر ءمينيسترى مۇحتار تىلەۋبەردى.
ءمينيستردىڭ ايتۋىنشا، رەسەي مەن ۋكراينا – قازاقستاننىڭ ەجەلدەن بەرگى دوستارى. پرەزيدەنت توقايەۆ ەكى ەلدىڭ كوشباسشىلارىمەن ۇنەمى بايلانىستا بولىپ، ولاردىڭ ءوزارا بەيبىتشىلىككە كەلۋىنە شاقىرۋدا.
«قازاقستاننىڭ كولىك جانە لوگيستيكا ءۇشىن ترانزيتتىك پۋنكت رەتىندە دامۋ الەۋەتىنە ەرەكشە نازار اۋدارىلادى. مەنىڭ ويىمشا، بۇل شەتەلدىك ينۆەستيسيانى تارتىپ، ەۋروپا مەن ازيانى بىرىكتىرەتىن ورتالىققا اينالادى»، – دەدى ءسىم باسشىسى.