باس پروكۋراتۋرا كەزەكتى ەكستراديسيا تۋرالى مالىمدەدى. قاداعالاۋشى ورگاننىڭ اقپاراتى بويىنشا، قازاقستانعا ءىرى الاياقتىق جاسادى دەگەن كۇدىككە ىلىنگەن وزبەكستان ازاماتشاسى جەتكىزىلدى، دەپ حابارلايدى aqshamnews.kz
2005-2007 جىلدارى بۇل ازاماتشا الماتى قالاسىنداعى قۇرىلىس كومپانياسىندا ەسەپشى بولىپ جۇمىس ىستەگەن. ول ۇلەسكەرلەردەن اقشا قابىلداپ، جالعان تۇبىرتەكتەر جازىپ بەرگەن. الايدا، تۇرعىن ءۇي كەشەنىنىڭ قۇرىلىسى اياقتالماعان.
«ونىڭ جانە قىلمىسقا قاتىسى بار باسقا تۇلعالاردىڭ ارەكەتتەرىنىڭ سالدارىنان الماتى قالاسىنىڭ 80-نەن استام تۇرعىنى زارداپ شەكتى. كەلتىرىلگەن شىعىن كولەمى 3،7 ميلليارد تەڭگەدەن استى»، – دەپ حابارلادى باس پروكۋراتۋرا.
الاياقتىق جاسالعاننان كەيىن كۇدىكتى قاشىپ كەتكەن جانە وعان حالىقارالىق ىزدەۋ جاريالانعان. 2023 جىلدىڭ جەلتوقسانىندا بۇل ايەل رەسەيدىڭ كراسنودار ولكەسىندە ۇستالدى. قازاقستان پروكۋراتۋراسىنىڭ سۇراۋى بويىنشا، ول ەكستراديسيالاندى.
ەندى كۇدىكتىنى 5 جىلدان 10 جىلعا دەيىن باس بوستاندىعىنان ايىرۋ، سونداي-اق مۇلكىن تاركىلەۋ جازاسى كۇتىپ تۇر.