2024 جىلى قازاقستاننىڭ سۋ قويمالارى رەكوردتىق 75 ميلليارد تەكشە مەتر سۋ جينادى. ونىڭ ىشىندە 12 ميلليارد تەكشە مەتر سۋ تاسقىنى كەزىندە كەلگەن سۋ، دەپ حابارلايدى aqshamnews.kz ق ر سۋ رەسۋرستارى مينيسترلىگىنە سىلتەمە جاساپ
بالقاش كولىنە بيىل 15،4 ميلليارد تەكشە مەتر سۋ كەلىپ ءتۇستى — بۇل وتكەن جىلمەن سالىستىرعاندا 4 ميللياردقا كوپ. ونىڭ شامامەن بەستەن ءبىرى سۋ تاسقىنى كەزىندە جينالعان. سونىمەن قاتار، سوڭعى 10 جىلدا العاش رەت قاپشاعاي سۋ قويماسى تولىق كولەمدە تولتىرىلدى.
كاسپيي تەڭىزىنە جىل باسىنان بەرى 17 ميلليارد تەكشە مەتر سۋ قۇيىلسا، سولتۇستىك ارال تەڭىزىنە 2،5 ميلليارد تەكشە مەتر سۋ جەتتى. بۇل وتكەن جىلمەن سالىستىرعاندا 400 ميلليون تەكشە مەترگە ارتىق.
«بيىل سۋ قويمالارىن تولىقتىرۋ بارىسىندا اگرارييلەر مەن باسقا دا سۋ پايدالانۋشىلاردىڭ مۇددەلەرى ەسكەرىلدى. ماسەلەن، شارۋا قوجالىقتارى سۋارۋ كەزەڭىندە شامامەن 11 ميلليارد تەكشە مەتر سۋ الدى»، — دەپ ءتۇسىندىردى سۋ رەسۋرستارى ءمينيسترى نۇرجان نۇرجىگىتوۆ.
قىزىلوردا وبلىسىندا سۋ ۇنەمدەۋ تەحنولوگيالارىن ەنگىزۋ ناتيجەسىندە 200 ميلليون تەكشە مەتر سۋ ۇنەمدەلىپ، ول سولتۇستىك ارالعا باعىتتالدى. جالپى، ايماقتاعى كولدەر جۇيەسىنە 4،7 ميلليارد تەكشە مەتر سۋ كەلدى، بۇل 2023 جىلمەن سالىستىرعاندا ءسال ارتىق.
ۇلىتاۋ وبلىسىنان قىزىلوردا وڭىرىنە 839 ميلليون تەكشە مەتر سۋ جىبەرىلدى. العاش رەت سارىسۋ وزەنى ارقىلى وتكەن بۇل سۋ كولەمى جەرگىلىكتى كولدەر جۇيەسىنە جەتتى.
بۇل جەتىستىكتەر سۋ رەسۋرستارىن ءتيىمدى باسقارۋدىڭ جانە جاڭا تەحنولوگيالاردى پايدالانۋدىڭ ايقىن مىسالىنا اينالدى.