رەسەيدە اسا كۇردەلى جاعداي ورىن الدى. جەكەمەنشىك اسكەري كومپانيانىڭ جەتەكشىسى ەۆگەنيي پريگوجين قارۋلى بۇلىككە شاقىردى دەپ ايتىپتالىپ، ۇستىنەن قىلمىستىق ءىس قوزعالدى. ءىستى فەدەرالدىق قاۋىپسىزدىك قىزمەتى قوزعاعان.
23 ماۋسىم، جۇما كۇنى كەشتە «ۆاگنەر» جەتەكشىسى پريگوجيننىڭ تەلەگرام ارناسىندا قارۋلى بۇلىككە شاقىرعان مالىمدەمە جاسادى. وندا ول رەسەي قورعانىس مينيسترلىگىنە قاراستى قارۋلى كۇشتەردىڭ وزدەرىنە شابۋىل جاساپ جاتقانىن، اريتيللەريالىق جانە اۋە سوققىسىنان ۆاگنەرلىكتەر قازا بولىپ جاتقانىن جەتكىزگەن. ول سوزىندە «ادىلدىك ورناتۋ ءۇشىن» ەلدىڭ اسكەري باسشىلىعىنا قارسى بۇلىك باستاعانىن مالىمدەگەن.
رەسەي قورعانىس مينيسترلىگى تاراتقان مالىمدەمەدە پريگوجيننىڭ اتىنان تاراتىلىپ جاتقان مالىمەتتەردى «ارانداتۋ» دەپ باعالاعان.
ءبىراق، رەسەيدەگى اقپارات قۇرالدارى دونداعى روستوۆ قالاسىندا اسكەري ءىس-قيمىلداردىڭ بولىپ جاتقىنىن حابارلاۋدا.
روستوۆتان ماسكەۋگە دەيىن اسكەري بلوكپوستتار قويىلعانىن BBC دە ءوزىنىڭ اقپارات كوزدەرىنە سىلتەي وتىرىپ مالىمدەدى.
پريگوجيننىڭ مالىمدەمەسىندە ەلدىڭ پرەزيدەنتىنەن تارتىپ، بارلىق ساياسي بيلىگى ورنىندا بولاتىنىن، اسكەري باسشىلىققا قارسى كۇرەسەتىنىن جەتكىزگەن.
ساراپشىلار بۇل جاعدايعا قاتىستى ءتۇرلى جورامال ايتۋدا. بىرەۋلەرى ۋكراينا تارابىنىڭ كەزەكتى ارانداتۋ ارەكەتى بولۋى مۇمكىن دەسە، ەندى ءبىرى قارۋلى بۇلىكتىڭ بولۋى شىندىققا جاقىن دەيدى. سەبەبى، رف قورعانىس ءمينيسترى شويگۋ مەن جالدامالى جاساقتاردىڭ جەتەكشىسى پريگوجين اراسىندا وسىعان دەيىن دە الاۋىزدىق بولىپ كەلگەن ەدى.