بۇل ماسەلە استانادا وتكەن وتىرىستا تالقىلاندى.
استانادا ءماجىلىس ءتوراعاسى ەرلان قوشانوۆتىڭ قاتىسۋىمەن قازاقستان رەسپۋبليكاسى پارلامەنتى ءماجىلىسى مەن رەسەي فەدەراسياسى فەدەرالدىق جينالىسى مەملەكەتتىك دۋماسى اراسىنداعى ىنتىماقتاستىق جونىندەگى پالاتاارالىق پارلامەنتتىك كوميسسياسىنىڭ وتىرىسى ءوتتى، دەپ حابارلايدى Almaty-akshamy.kz
كەزدەسۋ كەزىندە قازاقستان كورشى ەلدە قازاق تىلىندە وقىتاتىن 3 مەكتەپ سالۋدى جوسپارلاپ وتىرعانى بەلگىلى بولدى.
بۇعان دەيىن توقايەۆ قازاقستاننىڭ وڭتۇستىگىندە 3 ورىس مەكتەبى سالىناتىنىن ايتقان ەدى.
پالاتا سپيكەرى رەسەي قازاقستاننىڭ سەنىمدى وداقتاسى جانە ستراتەگيالىق سەرىكتەسى ەكەنىن اتاپ ءوتتى.
"جىل وتكەن سايىن ءبىزدىڭ قارىم-قاتىناسىمىز تەك نىعايا تۇسۋدە. بۇعان كوشباسشىلارىمىز قاسىم-جومارت كەمەل ۇلى توقايەۆ پەن ۆلاديمير ۆلاديميروۆيچ ءپۋتيننىڭ ارقاسىندا قول جەتكىزدىك. مەملەكەتتەر باسشىلارى ارىپتەستىكتى دامۋدىڭ جاڭا دەڭگەيىنە كوتەردى. قازاقستاندا حالىقتارىمىزدىڭ سانعاسىرلىق دوستىعى ەرەكشە باعالانادى"، – دەدى ەرلان قوشانوۆ.
ءماجىلىس سپيكەرى قازاقستان مەن رەسەي اراسىنداعى تاتۋ كورشىلىك جىلدارىندا دوستىق پەن سەنىمدى نىعايتۋعا باعىتتالعان بەرىك شارتتىق بازا قالىپتاسقانىن اتاپ ءوتتى.
سونداي-اق ەلدەرىمىزدى الەمدەگى ەڭ ۇزىن شەكارا بايلانىستىراتىنىن ايتىپ، بىلتىر ءوزارا ساۋدا كولەمى ايتارلىقتاي وسكەنىنە، تاۋار اينالىمىنىڭ شامامەن 70 پايىزى ءوڭىرارالىق جانە شەكارا ماڭى ساۋداسىنا تيەسىلى ەكەنىنە نازار اۋداردى. وعان ەكى ەلدەن مىڭداعان كومپانيا مەن ميلليونداعان ادام تارتىلعان.