رەسمي ساپارمەن قازان ايىنىڭ ورتاسىندا كەلۋى مۇمكىن.
رەسەي پرەزيدەنتى ۆلاديمير پۋتين ازياداعى ءوزارا ءىس-قيمىل جانە سەنىم شارالارى كەڭەسىنە قاتىسۋ ءۇشىن قازاقستانعا كەلەدى. بۇل تۋرالى ق ر سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«رەسەي پرەزيدەنتى ازياداعى ءوزارا ءىس-قيمىل جانە سەنىم شارالارى كەڭەسىنە قاتىسۋ ءۇشىن قازاقستانعا كەلەدى. سونىمەن قاتار تاۋەلسىز مەملەكەتتەر دوستاستىعى مەملەكەت باسشىلارىنىڭ كەڭەسىن وتكىزۋ جوسپارلانعان. ءبىز رەسەي پرەزيدەنتى قاتىسادى دەپ كۇتەمىز. ول قازان ايىنىڭ ورتاسىندا بولادى. رەسمي راستاۋىن كۇتىپ وتىرمىز. مەملەكەت باسشىسىنىڭ ءاربىر ساپارىندا ەكىجاقتى كەزدەسۋ وتكىزىلەدى»، - دەدى مۇحتار تىلەۋبەردى ەلوردادا ءوتىپ جاتقان الەمدىك جانە ءداستۇرلى دىندەر ليدەرلەرىنىڭ VII سەزى اياسىندا ب ا ق وكىلدەرىنىڭ ساۋالىنا وراي.
سونىمەن قاتار ول قازاقستان قايتالاما سانكسياعا تاپ بولمايتىندىعىن اتاپ ءوتتى.
«بىزدە انتيرەسەيلىك سانكسيانىڭ تەرىس ىقپالىن، ونىڭ ىشىندە قايتالاما سانكسيانى ەكونوميكامىزعا جىبەرمەۋ جونىندەگى ۇكىمەتتىك جۇمىس توبى قۇرىلعان. جۇمىس توبى جەمىستى جۇمىس ىستەپ، ەۋروپالىق كوميسسيامەن، اقش اكىمشىلىگىمەن تۇراقتى كونسۋلتاسيا جۇرگىزەدى»، - دەدى ول.