ارمان مينيازوۆ، ق ر ۇياو اتوم ەنەرگياسى ينستيتۋتىنىڭ تەحنولوگيالىق قۇزىرەتتىلىك ورتالىعىنىڭ ديرەكتورى، اتوم ەلەكتر ستانساسىنان الىناتىن ەنەرگيانى سۋتەگى وتىنىنا اينالدىرۋ مۇمكىندىگى جايلى ايتتى:
"اتوم ەلەكتر ستانساسىنىڭ ەنەرگياسىن سۋتەگىگە اينالدىرىپ، ونى بولاشاقتا مەتاللۋرگيا، ونەركاسىپ سالالارىندا جانە ترانسپورتتا قولدانۋعا بولادى. رەسەي مەن جاپونيا سياقتى ەلدەردە سۋتەگىمەن جۇرەتىن ترانسپورتتار بار، ال ءبىز دە قازاقستاندا بۇل باعىتتا جۇمىس ىستەۋگە مۇمكىندىگىمىز بار"، – دەدى ول.
عالىمدار مەتاننان سۋتەگى الۋ ءادىسىن زەرتتەۋدە، بۇل پروسەسس پيروليز دەپ اتالادى. وسى تەحنولوگيانىڭ كومەگىمەن شيكىزاتتان سۋتەگىن الۋ تيىمدىلىگى جوعارى – 90%-تەن اسادى.
"بۇل تەحنولوگيا ارزان بولمايدى، سەبەبى جوعارى تەحنولوگيالىق ءادىس بولعاندىقتان، باعاسى دا قىمباتىراق. ءبىراق ەكونوميكالىق تۇرعىدان قاراعاندا تيىمدىلىگى جوعارى. ەگەر بىزگە تازا سۋتەگى قاجەت بولسا، ونى وسى تەحنولوگيا ارقىلى الا الامىز. بۇل تەحنولوگيانى ءوزىمىزدىڭ ينستيتۋتتا جۇزەگە اسىردىق"، – دەپ ءتۇسىندىردى ارمان مينيازوۆ.
سۋتەگىن تاسىمالداۋ دا ءوز قيىندىقتارىن تۋدىرادى، الايدا ورتالىق عالىمدارى بۇل ماسەلەنى دە شەشۋدە.
"سۋتەگىن ساقتاۋعا ارنالعان ماتەريالداردى جاساۋ – ماڭىزدى قادامداردىڭ ءبىرى. سۋتەگى گاز بولعاندىقتان، ونىڭ ءورت قاۋىپتىلىگى بار، سوندىقتان ءبىز ونى قىسىمسىز ءارى ءقاۋىپسىز ساقتاۋ جولدارىن ىزدەستىرىپ، ارنايى ماتەريالدار جاساپ، سولار ارقىلى سۋتەگىنى ءقاۋىپسىز تۇردە ساقتاۋدى قامتاماسىز ەتەمىز"، – دەدى ارمان مينيازوۆ.
اتوم ەنەرگەتيكاسىنىڭ جانە سۋتەگىن ءوندىرۋدىڭ جاڭا تەحنولوگيالارى قازاقستاننىڭ ونەركاسىبىن جانە كولىك جۇيەسىن دامىتۋدىڭ نەگىزگى قوزعاۋشى كۇشتەرىنىڭ ءبىرى بولماق.