ايىپپۇل مولشەرى – جارتى ميلليون تەڭگە.
قارجى مەملەكەت پايداسىنا تولىق كولەمدە ءوندىرىلدى، دەپ حابارلايدى aqshamnews.kz
اتىراۋدا قوس ازاماتتىعى بار ادامعا 516 مىڭ 880 تەڭگە ايىپپۇل سالىندى. وبلىستىق پوليسيا دەپارتامەنتى كوشى-قون قىزمەتى باسقارماسى قوس ازاماتتىعى بار قۇرمانعازى اۋدانىنىڭ تۇرعىنىن انىقتادى. ول قازاقستان رەسپۋبليكاسىندا تۋىپ، 2002 جىلى العاش رەت قازاقستان ازاماتىنىڭ جەكە باسىن كۋالاندىراتىن قۇجاتتارىن راسىمدەگەن. الايدا 2023 جىلى رەسەي فەدەراسياسىنىڭ ازاماتتىعىن قابىلداپ، سول جىلى شىلدەدە رەسەي ازاماتتىعىن كۋالاندىراتىن قۇجاتتارىن العان.
«انىقتالعان ەر ادامعا ق ر زاڭناماسىندا بەلگىلەنگەن مەرزىمدەردە شەتەل ازاماتتىعىن الۋ فاكتىسىن حابارلاماۋ بويىنشا اكىمشىلىك حاتتاما تولتىرىلىپ، ءىس-قۇجاتتار پروسەسسۋالدىق شەشىم قابىلداۋ ءۇشىن قۇرمانعازى اۋداندىق سوتىنا جولداندى. سوت شەشىمىمەن ازامات كىنالى دەپ تانىلىپ، وعان 140 ايلىق ەسەپتىك كورسەتكىش، ياعني 516 880 تەڭگە كولەمىندە ايىپپۇل سالىندى. ايىپپۇل مەملەكەت پايداسىنا تولىق كولەمدە ءوندىرىلدى»، – دەلىنگەن حابارلامادا.
سونىمەن قاتار اتالعان دەرەك نەگىزىندە 47-جاستاعى ەر ادامدى قازاقستان ازاماتتىعىنان ايىرىپ، مالىمەتتەر ءتيىستى اقپاراتتىق جۇيەلەرگە ەنگىزىلدى.
ايتا كەتسەك، جىل باسىنان بەرى اتىراۋ وبلىسىندا قازاقستان رەسپۋبليكاسىنىڭ ازاماتتىعىنان ايىرۋ تۋرالى 192 دەرەك تىركەلگەن. ونىڭ ىشىندە 17 ادام – قوس ازاماتتىعى بار ادامدار. سوت شەشىمدەرىمەن 15 ادامعا ايىپپۇل سالىنسا، 2 ادام ق ر اكىمشىلىك جولمەن شىعارىلعان. ولارعا قازاقستان اۋماعىنا 5 جىلعا دەيىن كىرۋگە تىيىم سالىندى.
قازاقستان زاڭناماسى بويىنشا قوس ازاماتتىققا تىيىم سالىنعان. قازاقستان ازاماتتىعىن العان تۇلعالار 30 كۇن ىشىندە بۇرىنعى ەلىنىڭ پاسپورتىن تاپسىرۋعا مىندەتتى. بۇل تالاپتار باسقا مەملەكەتتىڭ ازاماتتىعىن قابىلداعان قازاقستان ازاماتتارىنا دا قاتىستى.