ق ر پرەمەر-مينيسترىنىڭ ورىنباسارى تامارا دۇيسەنوۆانىڭ توراعالىعىمەن جوعارى وقۋ ورىنىنىڭ باسقارما ءتوراعاسى – رەكتورى قىزمەتىنە ۇمىتكەرلەردى ايقىنداۋ جونىندەگى رەسپۋبليكالىق كوميسسيانىڭ وتىرىسى ءوتتى. اتالعان كوميسسيانىڭ قۇرامىندا ق ر پارلامەنتى ءماجىلىسىنىڭ دەپۋتاتتارى، عىلىم جانە جوعارى ءبىلىم مينيسترلىگىنىڭ، جوو-لار قاۋىمداستىعىنىڭ، «اتامەكەن» ۇلتتىق كاسىپكەرلەر پالاتاسىنىڭ وكىلدەرى جانە قوعام قايراتكەرلەرى بار.
ەڭ الدىمەن، جيىنعا قاتىسۋشىلارعا رەكتورلاردى جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى قىزمەتتى جۇزەگە اسىراتىن ۇيىمداردىڭ باسقارما ءتوراعاسى – رەكتورىن ايقىنداۋ جونىندەگى ءتارتىپتىڭ جاڭا جوباسى تانىستىرىلدى. وعان سايكەس ۇمىتكەرلەرگە قويىلاتىن تالاپتار كۇشەيتىلەدى. ەڭ باستى ماقسات – ءتيىمدى مەنەدجمەنت ارقىلى جوعارى ءبىلىم ساپاسىن كوتەرۋگە ىقپال ەتۋ.
جوباعا سايكەس رەكتورلىققا ۇمىتكەردىڭ عىلىمي دارەجەسى بولۋى كەرەك. كانديداتتىڭ عىلىمي اتاعى (پروفەسسور، دوسەنت) دا ەسكەرىلەدى. سونداي-اق ءبىلىم جانە عىلىم سالاسىندا كەم دەگەندە 5 جىل باسقارۋ تاجىريبەسى بولۋى مىندەت. ۇمىتكەردەن قازاق جانە ورىس تىلدەرىندە ەركىن سويلەي الۋ تالاپ ەتىلەدى. قوسىمشا اعىلشىن ءتىلىن مەڭگەرگەنى دە قۇپتالادى. بۇل تەك رەكتورعا قويىلاتىن تالاپتاردىڭ ءبىر بولىگى عانا.
كەزەكتى وتىرىس بارىسىندا بىرنەشە جوعارى وقۋ ورنىنىڭ باسشىلىعىنا ۇمىتكەرلەر تىڭدالدى.
قاراعاندىداعى ءا. ساعىنوۆ اتىنداعى تەحنيكالىق ۋنيۆەرسيتەتىنە ساۋلە ساعىنتايەۆانىڭ كانديداتۋراسى ءبىراۋىزدان ماقۇلدانىپ، تاعايىنداۋ تۋرالى ۇسىنىس بەرىلدى. ال ەكىنشى ۇمىتكەر عىلىم جانە جوعارى ءبىلىم مينيسترلىگىنىڭ كادرلىق رەزەرۆىنە ەنگىزىلدى. اتالعان جوو تاۋ-كەن ءىسى، گەولوگيا، گەودەزيا جانە كارتوگرافيا، ماشينا جاساۋ، ەنەرگەتيكا، كولىك، ساۋلەت جانە قۇرىلىس، ت.ب. باعىتتار بويىنشا مامانداردى دايارلايدى.
ءى. جانسۇگىروۆ اتىنداعى جەتىسۋ ۋنيۆەرسيتەتى – وڭىردەگى پەداگوگيكالىق كادرلاردى ازىرلەيتىن نەگىزگى ورتالىقتاردىڭ ءبىرى. ونىڭ رەكتورى قىزمەتىنە 3 ۇمىتكەر قاراستىرىلدى. ناتيجەسىندە كوميسسيا مۇشەلەرىنىڭ كوپشىلىك داۋسىمەن ەرمەك بۇرىبايەۆتىڭ كانديداتۋراسى ۇسىنىلدى.
رۋدنىي يندۋستريالدى ۋنيۆەرسيتەتى ەلدىڭ جانە ءوڭىردىڭ ەڭبەك نارىعىنا نەگىزىنەن تەحنيكالىق عىلىمدار مەن تەحنولوگيالار بويىنشا مامانداردى دايىندايدى. رەسپۋبليكالىق كوميسسيا رەكتورلىققا 3 ۇمىتكەردى قاراستىردى. وقۋ ورنىن دامىتۋعا باعىتتالعان باعدارلامالاردىڭ بارلىعى جوعارى باعالاندى. ناتيجەسىندە كوميسسيا مۇشەلەرى جوو رەكتورىن سايلاۋدى قوسىمشا قاراستىرۋ تۋرالى شەشىم قابىلداپ، شارانى كەيىنگە شەگەرۋدى ۇيعاردى.