رەفەرەندۋمنىڭ الدىن الا قورىتىندىسى جاريالاندى
ق ر ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ رەفەرەندۋمنىڭ الدىن الا قورىتىندىسىن جاريالادى دەپ حابارلايدى Almaty-akshamy.kz
سپيكەر كەلتىرگەن مالىمەتتەرگە سۇيەنسەك، 2022 جىلعى 6 ماۋسىمدا تاڭعى 08.00-دەگى جاعداي بويىنشا ەلىمىزدىڭ بارلىق وڭىرلەرىندەگى جانە شەت ەلدەردەگى رەفەرەندۋمنىڭ 10012 ۋچاسكەسىندە داۋىستاردى ساناۋ اياقتالدى.
رەفەرەندۋمعا قاتىسۋ قۇقىعى بار قازاقستان رەسپۋبليكاسى ازاماتتارىنىڭ جالپى سانى 11 ميلليون 734 مىڭ 642 ادامدى قۇرادى. داۋىس بەرۋگە قاتىسقان ازاماتتاردىڭ سانى 7 ميلليون 986 مىڭ 293 ادامدى نەمەسە رەفەرەندۋمعا قاتىسۋ قۇقىعى بار ازاماتتار سانىنىڭ 68،06%-ىن قۇرادى. رەفەرەندۋمعا قويىلعان ماسەلەنىڭ وڭ شەشىمىن جاقتاپ داۋىس بەرگەن ازاماتتاردىڭ سانى ەلىمىزدىڭ بارلىق وڭىرلەرىندە داۋىس بەرۋگە قاتىسقانداردىڭ 77،18 پايىزىن نەمەسە 6 ميلليون 163 مىڭ 863 ادامدى قۇرادى.
كونستيتۋسيالىق تۇزەتۋلەرگە قارسى داۋىس بەرگەن ازاماتتاردىڭ سانى -18،66 پايىز نەمەسە داۋىس بەرۋگە قاتىسقاندار سانىنىڭ 1 ميلليون 490 مىڭ 475 ادامىن قۇرايدى.
جاۋاپتاردىڭ ەكى نۇسقاسى دا تاڭداپ الىنعان، ياعني جارامدى دەپ تانىلعان، الايدا داۋىستاردى ساناۋ كەزىندە ەسكەرىلمەيتىن بيۋللەتەندەر سانى – 1،58%-دى نەمەسە 125 مىڭ 859 بيۋللەتەندى قۇرادى. داۋىس بەرۋشىلەردىڭ ەرىك ءبىلدىرۋىن انىقتاۋ مۇمكىن بولمايتىن جانە جارامسىز دەپ تانىلعان، بەلگىلەنبەگەن ۇلگىدەگى بيۋللەتەندەر سانى 2،58% - دى نەمەسە 206 مىڭ 096 بيۋللەتەندى قۇرادى.
رەسپۋبليكالىق رەفەرەندۋمنىڭ قورىتىندىلارى قازاقستان رەسپۋبليكاسى ورتالىق رەفەرەندۋم كوميسسياسىنىڭ وتىرىسىندا بەلگىلەنەتىن بولادى.