قازاقستان ەلشىسى تيمۋر پىرىمبەتوۆ لاتۆيا رەسپۋبليكاسى ورتالىق سايلاۋ كوميسسياسىنىڭ (وسك) ءتورايىمى كريستينا بەرزينيامەن كەزدەستى، دەپ حابارلايدى Almaty-akshamy.kz Almaty.tv-گە سىلتەمە جاساپ.
پىرىمبەتوۆ 2022 جىلعى 5 ماۋسىمدا ەلىمىزدە وتەتىن قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى جالپىۇلتتىق رەفەرەندۋمعا دايىندىق بارىسى تۋرالى ايتىپ بەردى.
ەلشى كونستيتۋسيالىق رەفورما جۇيەلى سيپاتقا يە ەكەنىن جانە پرەزيدەنت قاسىم-جومارت توقايەۆ باستاماشىلىق ەتكەن «جاڭا قازاقستاندى» قۇرۋ جونىندەگى اۋقىمدى ساياسي رەفورمالاردى ىسكە اسىرۋعا باعىتتالعانىن اتاپ ءوتتى.
رەفەرەندۋمعا قويىلاتىن ماسەلەلەر بيلىك تارماقتارى اراسىنداعى ءوزارا قارىم-قاتىناستاردىڭ وڭتايلى تەڭگەرىمىن قالىپتاستىرۋ جانە مەملەكەت پەن قوعام اراسىندا ءتيىمدى ديالوگ قۇرۋ ماقساتىندا قولدانىستاعى ساياسي مودەلدىڭ تۇجىرىمدامالىق ترانسفورماسياسىنا قاتىستى.
ك. بەرزينيا قازاقستان وسك ءتوراعاسىنىڭ شاقىرۋىمەن لاتۆيالىق تاراپ ەلىمىزگە رەفەرەندۋمنىڭ حالىقارالىق باقىلاۋشىلارى رەتىندە ەكى وكىلدى جىبەرەتىنىن حابارلادى. لاتۆيا وسك باسشىسى بيىلعى قازاندا وتەتىن لاتۆياداعى پارلامەنتتىك سايلاۋعا دايىندىق بارىسى تۋرالى دا ايتتى.
كەزدەسۋ سوڭىندا تاراپتار ەكى ەلدىڭ سايلاۋ كوميسسيالارى اراسىنداعى سىندارلى ىنتىماقتاستىقتى جالعاستىرۋعا مۇددەلى ەكەندەرىن راستادى.