قازاقستان قۇتقارۋشىلارى اراسىندا رەسپۋبليكالىق تۋرنير بيىل اقتاۋ قالاسىندا ءوتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
دودا قورىتىندىسىندا نۇر-سۇلتان قالاسىنىڭ كومانداسى ءبىرىنشى ورىندى يەلەنسە، شىعىس قازاقستان وبلىسىنىڭ قۇتقارۋشىلارى ەكىنشى ورىنعا جايعاستى، دەپ حابارلايدى قازاقپارات ءتىلشىسى. ءورت ءسوندىرۋ-قۇتقارۋ سپورتى بويىنشا تۋرنير اقتاۋ قالاسىنداعى «جاس قانات» سپورت كەشەنىندە ءوتتى. ق ر «ءورت سوندىرۋشىلەر مەن قۇتقارۋشىلاردىڭ سپورت فەدەراسياسى» قوعامدىق بىرلەستىگى اتقارۋشى كوميتەتىنىڭ ديرەكتورى داۋرەن دانايەۆتىڭ ايتۋىنشا، ءورت ءسوندىرۋ-قۇتقارۋ سپورتى بويىنشا مۇنداي جارىستار قىزمەتكەرلەردىڭ ۇيىمشىلدىعىن ارتتىرىپ، جۇمىسقا، سپورتقا دەگەن قۇلشىنىسىن، نيەتىن ارتتىرادى.
تۋرنيردە 9 وبلىس جانە نۇر-سۇلتان، الماتى، شىمكەنت قالالارى توتەنشە جاعدايلار دەپارتامەنتتەرىنىڭ كوماندالارى، سونداي-اق مالىك عابدۋللين اتىنداعى ازاماتتىق قورعاۋ اكادەمياسىنىڭ قۇراما كومانداسى جانە 12 ايەلدەر كومانداسى سىنعا ءتۇستى. شقو توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءوڭىر نامىسىن قورعاۋعا ەڭ مىقتى دەگەن قۇتقارۋشىلار اتتاندى.
«كوماندالار اۋەلى كەدەرگىلەرى بار ءجۇز مەترلىك جولاقتان جۇگىرىپ جارىستى. وندا ءوڭىر سپورتشىلارى ءۇشىنشى ورىن الدى. ال وقۋ-جاتتىعۋ مۇناراسىنىڭ 4-قاباتىنىڭ تەرەزەسىنە شابۋىل ساتىسىمەن كوتەرىلۋدە ءبىزدىڭ سپورتشىلار ءبىرىنشى بولدى. ەكى جارىستىڭ قورىتىندىسى بويىنشا شىعىس قازاقستان كومانداسى نۇر-سۇلتان قالاسىنىڭ كومانداسىمەن ۇپاي سانى بىردەي بولىپ، ءبىرىنشى ورىندى ءبولىستى. الايدا، جاۋىنگەرلىك قانات جايۋدا بىرنەشە سەكۋند جەتپەي قالدى. جارىس قورىتىندىسى بويىنشا شقو تجد سپورتشىلارى ەكىنشى ورىندى يەلەندى»، - دەلىنگەن اقپاراتتا.