كەشە، 28 قىركۇيەك الماتى اۋەجايى مەن ءقوناقۇي ماڭىندا فۋتبول جانكۇيەرلەرى "رەال مادريد" ويىنشىلارىن ىستىق ىقىلاسپەن قارسى العان ەدى. جانكۇيەرلەردىڭ ەرەكشە قولداۋىنا قاتىستى كوماندا ويىنشىسى فەدەريكو ۆالۆەردە پىكىر ءبىلدىردى، دەپ حابارلايدى Aqshamnews.kz.
جارتىلاي قورعاۋشى مۇنداي جايتتىڭ ولار ءۇشىن قالىپتى جاعداي ەكەنىن جەتكىزدى.
"ءيا، بۇل ءبىز ءۇشىن قالىپتى جاعداي. ءبىزدى قالاي قارسى العانىن كورىپ، قاتتى قۋاندىق. بىزدەن الىس ەلدەن قارسى الۋشىلاردىڭ بولعانى – ۇلكەن قۋانىش. الىس مەملەكەتكە بارىپ، جانكۇيەرلەرىمىزدى كورۋ – ءبىز ءۇشىن ماقتانىش. ولارعا جەڭىس سىيلاۋعا تىرىسامىز، – دەدى ۆالۆەردە.
سونىمەن قاتار ويىنشى الداعى ماچقا دا توقتالدى:
"ءبىز كەز كەلگەن ويىندا جەڭىسكە تاباندىلىق تانىتامىز. بۇعان دەيىنگى قاتەلىكتەردىڭ ورنىن تولتىرعىمىز كەلەدى. سول سەبەپتى بۇرىنعى سەنارييدى قايتالاعىمىز كەلمەيدى"، – دەدى ول.
ايتا كەتەيىك، 30 قىركۇيەك كۇنى الماتىداعى ورتالىق ستاديوندا «رەال مادريد» پەن «قايرات» اراسىنداعى كەزدەسۋ وتەدى.
28 قىركۇيەك الماتىداعى "رەال" فاناتتارى سۇيىكتى كلۋبىن اۋەجاي مەن قوناقۇيدە اتوي سالىپ قارسى العان ەدى.