مەملەكەت باسشىسى قاسىم-جومارت توقايەۆتىڭ بۇگىنگى جولداۋى كوپشىلىكتىڭ كوڭىلىندە جۇرگەن ماسەلەلەرگە جاۋاپ بەردى. مۇنداي پىكىردى ساياساتتانۋشى راسۋل جۇمالى ءبىلدىردى، دەپ حابارلايدى almaty-akshamy.kz
«ەڭ باستىسى - ىشتەگى جانە سىرتتاعى ءتۇرلى تاۋەكەلدەرگە بوي ۇسىنباي، دەموكراتيالىق رەفورمالار جالعاسىن تابادى. ۇلتتىق قۇرىلتايدىڭ قۇرىلاتىنى، جەرگىلىكتى ءوزىن-وزى باسقارۋدى كۇشەيتۋ مەن اكىمدەردى تاڭداۋ، جاڭا پارتيالارعا جول اشۋ، ادام قۇقىقتارىنىڭ قورعالۋىن جەتىلدىرۋ سەكىلدى ناقتى قادامدار ىسكە اسپاق. قاسىم-جومارت كەمەل ۇلى سۋپەرپرەزيدەنتتىك جۇيەنىڭ ەسكىرگەنىن العا تارتا وتىرىپ ءوزىنىڭ پارتياعا مۇشە بولمايتىنىن مالىمدەدى جانە قۇزىرەتتەرىنىڭ ءبىرتالايىن پارلامەنتكە بەرىپ، ونىڭ الەۋەتىن كۇشەيتپەك»،- دەيدى ساياساتتانۋشى.
سونىمەن قاتار، ول پرەزيدەنتتىڭ تۋىستارىنا مەملەكەتتىك بيلىكتە نەمەسە ۇلتتىق كومپانيالاردا، كۆازيمەملەكەتتىك سەكتوردا قىزمەت ىستەۋگە تىيىم سالاتىن جاڭا زاڭ قابىلداناتىنىن قۇپتارلىق ءىس دەيدى.
«پرەزيدەنت تۋىستارىنىڭ مەملەكەتتىك قىزمەت پەن ۇلتتىق كومپانيالاردا جۇمىس ىستەۋىنە تىيىم سالىنادى. بارشا الاش بالاسىن ەرەكشە قۋانتقان جاڭالىق - كەزىندە قىسقارىپ قالعان جەزقازعان، سەمەي وڭىرلەرىنە وبلىس مارتەبەسىن بەرىپ، ولاردى جاڭعىرتۋ، سونداي-اق الماتى وبلىسىن اكىمشىلىك باسقارۋ جۇيەسىن جەتىلدىرۋ ءۇشىن ەكىگە ءبولۋ. ولارعا بەرىلەتىن اتاۋلاردان قازاقى ءيىس اڭقىپ تۇر - تيىسىنشە ۇلىتاۋ، اباي، جەتىسۋ. ارينە، پرەزيدەنت بۇگىن جاساعان ۇسىنىستار مەن مىندەتتەر الدەقايدا كەڭ اۋقىمدا ءتۇسىنۋدى تالاپ ەتەدى. الايدا ءقازىردىڭ وزىندە ادىلەتتى قوعام مەن ەل يگىلىگىن باسىمدىق رەتىندە العان جاڭا قازاقستان تۇجىرىمداماسى ىسكە اسىپ جاتقانى كۇمان تۋدىرماس»، - دەدى راسۋل جۇمالى.
ونىڭ پايىمداۋىنشا، پرەزيدەنت وسى جولعى جولداۋىندا بۇرىننان حالىقتىڭ كوكەيىندە جۇرگەن ماسەلەلەرگە نازار اۋدارىپ، ولقىلىقتاردىڭ الدىن الۋعا تىرىسقان.
«جولداۋدا ەڭ الدىمەن بۇرىننان ويدا جۇرگەن ماسەلەلەردىڭ شەشىلەتىنى قۋانتتى»، – دەدى ساياساتتانۋشى.