نەمەسە بەرەكەنى كوكتەن ەمەس، ەتكەن ەڭبەكتەن تىلە.
اركىم ءوز ءۇيىن، اۋلاسىن تازا ۇستايدى. وتباسىنان ۇزاپ سىرتقا، كوشەگە، دۇكەنگە، مەكتەپكە، جۇمىسقا شىققاندا دا، اينالامىز تاپ-تازا بولىپ جاتادى. ال سوندا وسىنشاما ۇلكەن الماتىنى كىمدەر تازالايدى؟ بۇگىن سول تۋرالى ايتامىز.
شاھاردا «الماتى تازالىق» دەپ اتالاتىن ىرگەلى مەكەمە بار. ونىڭ دا الا تاڭنان باستالاتىن قايناعان ءومىرى، ءوز تىنىس-تىرشىلىگى بار. كاسىپورىنعا 727 تەحنيكا تيەسىلى. 1728 جۇمىسكەر ەڭبەك ەتىپ ءجۇر. ولار جىلدىڭ ءتورت مەزگىلىندە دە ءاردايىم ساپتا تۇرادى. ياعني الماتىنىڭ ءبىراز بولىگىنىڭ تازالىعىنا وسى قالا اكىمدىگىنىڭ شارۋاشىلىق جۇرگىزۋ قۇقىعىنداعى «الماتى تازالىق» مەملەكەتتىك كوممۋنالدىق كاسىپورنى جاۋاپتى.
ونداعى ەڭبەككەرلەر كوبىمىزگە قاراعاندا جىلى توسەگىنەن تىم ەرتە، تاڭ اتپاستان تۇرادى. ۇيىقتاپ جاتقان بالالارىنىڭ، نەمەرەلەرىنىڭ بەتىنەن ءسۇيىپ، تاڭ قاراڭعىلىعىندا جۇمىستى بەتكە الادى. ولار، اسىرەسە، قالىڭ قار جاۋعان كۇنى، ءبىز ءالى دە شىرت ۇيقىدا جاتقان ساتتە، جۇزدەرىن اياز قارىپ، قار كۇرەپ، اينالانى ارشىپ جۇرەدى. ءيا، ولار بارشامىزدىڭ ساياباق، سكۆەرلەردە تازا اۋا جۇتىپ، تازا جەردى باسىپ، تازا تروتۋارمەن ءجۇرىپ، اۆتوبۋسقا تازا ايالدامادان وتىرىپ، كۇنىمىزدىڭ جاقسى باستالۋى ءۇشىن دە ەڭبەك ەتەدى.
ولار اۋىر تەحنيكالاردى تىزگىندەيدى، كونتەينەرلەردى كوتەرەدى، سۇيرەيدى. قولدارىنان كۇرەك، سىپىرتقى تۇسپەيدى. مۇنداي جۇمىستارعا قارۋلى قولدار جانە ءتوزىمدى ءھام سابىرلى ادامدار عانا شىدايدى. ال ارالارىندا ايەل-انالار دا از ەمەس. ولار – ناعىز ەڭبەك ادامدارى!
قىس كەزىندە قالىڭ جاۋعان قاردى كۇرەۋ، جاياۋ جۇرگىنشىلەر جولىن تازالاۋ، مۇز ويۋ، تايعاق جەرگە تۇز، قۇم سەبۋ، ال كۇزدە توگىلىپ تۇسەتىن سارىالا جاپىراقتاردى ءالسىن-الىسن سىپىرىپ الۋ، جاز مەزگىلىندە، شىلىڭگىر شىلدەدە كۇنگە قاقتالا ءجۇرىپ ارىقتاردى، ايالدامالاردى تازالاۋ – ۇلكەن جۇمىس. ونىڭ قانشالىقتى اۋىرلىعىن كوشە تازالىعىنا جاۋاپتى ەڭبەك ادامدارى وتە جاقسى بىلەدى.
– ءبىزدىڭ «الماتى تازالىق» مەكەمەسىندە تەك جاۋاپتى، ءوز ىسىنە قۇرمەتپەيتىن قارايتىن جاندار جۇمىس ىستەيدى دەپ بىلەمىن. ولار جىلدىڭ ءتورت مەزگىلىندە دە، «داۋىلدارعا دا، جاۋىندارعا» قاراماستان، ۇنەمى ات ۇستىندە جۇرەدى. ءبىزدىڭ ءار كۇنىمىز جوسپارلانعان. سوندىقتان جۇمىستىڭ ءبارى ءوز جۇيەسىن تاپقان، – دەيدى «الماتى تازالىق» مەملەكەتتىك كوممۋنالدىق كاسىپورنىنىڭ ديرەكتورى ادىلەت توقتاسىنوۆ.
دينا مۇناربايەۆا: جۇمىستان كەيىن نەمەرەلەرىمە اسىعامىن
ساعات تاڭعى 5-تە تۇرامىن. سەبەبى، قالاعا سوناۋ شامالعان بەكەتىنەن كولىكتەر كەپتەلىسىنە قالىپ قويماي، ەرتەرەك جەتۋىم كەرەك. سوسىن ءبارىمىزدى جۇمىس ورنىمىزعا ارنايى كولىكپەن اكەلىپ سالادى. بىزگە بولىنگەن ۋچاسكە - ءال-فارابي داڭعىلىنان جوعارى قاراي «تاۋلى قىرات» ىقشاماۋدانىنا دەيىنگى ارالىق. كۇندە ادەمى تاۋلاردىڭ ەتەگىندە، تازا اۋادا جۇرەمىز.
كوشە تازالىعىن ساقتاۋ – ءبىز ءۇشىن ۇلكەن جاۋاپكەرشىلىك. جىلدىڭ ءتورت مەزگىلىنىڭ ءوز قيىندىعى بار. جۇمىستىڭ وڭايى جوق دەسەك تە، شىن كوڭىلىڭمەن ىستەگەن كەز كەلگەن ىستەن بەرەكە تابۋعا بولادى دەپ ويلايمىن. وسى جۇمىستا جۇرگەنىمە تورت-بەس جىلدىڭ ءجۇزى بولىپتى، ۇيرەنىپ تە قالدىم. بۇل، ءبىر جاعىنان، بىزگە دەنەنى شىنىقتىرۋ ءرولىن اتقارادى، ۇنەمى قيمىل-قوزعالىس ۇستىندە جۇرەمىز. دەنساۋلىققا پايدالى. توڭساق، شايىمىزدى ءىشىپ، بوي جىلىتىپ الامىز. ءۇزىلىس اراسىندا بىر-بىرىمىزبەن شۇيىركەلەسە اڭگىمەلەسىپ، اراسىندا ءازىل-قالجىڭعا دا ەرىك بەرەمىز.
ءيا، كەيدە كوز الدىمىزدا ءقازىر عانا سىپىرىپ، تازالاعان جەرىڭە بىرەۋ تەمەكىدەن بوساعان قورابىن لاقتىرىپ كەتە بارعاندا، قىنجىلىپ قالاتىنىمىز بار. كەيدە «كوز الدىڭىزدا تۇرعان قوقىس جاشىگىنە سالساڭىز قايتەر ەدى» دەپ ەسكەرتەمىز. ىستەگەن ىسىنە ۇيالىپ، كەشىرىم سۇرايتىندار دا جوق ەمەس.
ال كەشكە وتباسىڭا قالجىراپ ورالعاندا، الدىڭنان نەمەرەلەرىڭ تومپاڭداپ جۇگىرىپ شىققاندا، كۇنى بويعى شارشاعانىڭ ۇمىتىلىپ كەتەدى.
رايسا كيىكبايەۆا: ادال ەڭبەكتىڭ نانى ءتاتتى
ءبىز قازىبەك بي كوشەسىنەن رايىمبەك داڭعىلىنا دەيىنگى ارالىقتى تازالايمىز. الماتى ىرگەسىندەگى ەڭبەكشىقازاق اۋدانىنان كەلىپ ىستەپ ءجۇرمىن. سوندىقتان ۇلگەرۋ ءۇشىن ساعات تاڭعى 5-تە تۇرامىن. ساعات 8-دە جۇمىسقا كىرىسىپ كەتەمىز. تاپسىرىلعان جۇمىسىمىزدى تىڭعىلىقتى اتقارامىز. 11 جىل بولىپتى كوشە تازالاۋشى بولىپ جۇرگەنىمە. راس، العاشقى كەزدە قىسىلاتىنمىن، «تانىستار كەزدەسىپ قالماسا ەكەن» دەپ، بەتىمدى بەتپەردەمەن، ورامالمەن بۇركەپ الاتىنمىن. كەيىن «جاسىرىناتىنداي مەن ۇرلىق جاساپ ءجۇرمىن بە، بىرەۋدى الداپ ءجۇرمىن دە، نانىمدى ادال تاۋىپ، وتباسىمدى اق ادال ەڭبەگىممەن اسىراپ جۇرگەن جانمىن عوي» دەپ ويلادىم. ءتىپتى، العاشقى كەزدەرى بالالارىمدى جۇمىس ورنىما ەرتىپ كەلەتىنمىن، انالارىنىڭ قايدا ىستەپ جۇرگەنىن كورسىن، ەڭبەكتىڭ، تازالىقتىڭ ءقادىرىن ءبىلسىن دەپ. ولارعا جۇمىستىڭ ۇلكەن-كىشىسى بولمايتىنىن، قانداي جۇمىس ىستەسەڭ دە قولعا جۇقپايتىنىن، تەك ادال ەڭبەكتىڭ عانا نانى ءتاتتى بولاتىنىن تۇسىندىرگىم كەلدى. شۇكىر، بالالارىم جاقسى بولىپ ءوستى.
وتاعاسىم - گيدروتەحنيك. وسى قاراپايىم جۇمىسىم بار، كۇيەۋىمنىڭ تابىسى بار دەگەندەي، ءسويتىپ، قىزىمىزدى ۇزاتىپ، ۇلدى ۇيلەندىردىك. جالاقىمىز ەشقاشان كەشىكتىرىلمەيدى. باستىسى سول عوي. ەكى بريگادا ىستەيمىز. ەرلەر جاعى تۇندە، تەحنيكامەن كەلىپ ىستەپ كەتەدى. ءبىز ايەلدەر ەرتەڭىنە كۇندىز قولمەن اتقارىلاتىن جۇمىستاردى تىندىرامىز.
اسقار جۇمانيازوۆ: وزىمدىكى، وزگەنىكى دەپ بولمەيمىن
شىنىمدى ايتسام، وسى جۇمىسقا كەلگەنىمدە، باسىمدا بانك نەسيەسى بولعان. مەملەكەتتىڭ وسىلاي بىزگە جاساپ وتىرعان مۇمكىندىگىن، ءبىزدى قوعامدىق جۇمىستارعا تارتىپ، «ەكى قولعا ءبىر كۇرەك» تاۋىپ بەرىپ وتىرعانىن اتاپ وتكىم كەلەدى. «جامان، جامان» دەي بەرسەڭ، بىرەۋ جاقسىسىن اكەلىپ بەرە مە، ماسىلدىق پيعىلدان ارىلۋ كەرەك. ىستەيمىن دەگەن ادامعا جۇمىس تابىلادى، تەك نيەت كەرەك. ءقازىر نەسيەمنەن قۇتىلدىم. وسى كوشە تازالاپ ءجۇرىپ-اق وتەدىم. ەندى الداعى جىلى ۇلىمدى ۇيلەندىرسەم دەيمىن.
شىنى كەرەك، قوعام بولعاسىن، ءتۇرلى ادام بار دەگەندەي. كەيدە كوشەدە بىزگە، كوشە سىپىرۋشىلارعا شەكەسىنەن قاراپ وتەتىندەر بار. العاشىندا قابىلداي الماي، قينالىڭقىراپ قالاتىنمىن. ال ءقازىر ۇيرەندىم، سەبەبى ونداي كوزقاراس سول «مەن بيىكپىن» دەگەن ادامنىڭ شىن مانىندە تومەندىگىن كورسەتىپ تۇرعانىن ءتۇيسىندىم. ەڭبەگىڭ ادال ما، ودان ەش ۇيالماۋ كەرەك. ءوزىم دە ءۇيدىڭ، اۋلامنىڭ، اينالامنىڭ جيناقى، تازا تۇرعانىن جاقسى كورەتىن ادام ەدىم. سوندىقتان دالانىڭ، قوعامنىڭ، مەملەكەتتىڭ جۇمىسىن دا وزگەنىكى دەمەيمىن، وزىمدىكىندەي اتقارامىن. ال جاقسى ورتانى، قوعامدى جاسايتىن مىنا ءارقايسىمىز. ادال ەڭبەگىمە قاراي تابىسىمدى دا ۋاقىتىندا الىپ وتىرمىن. ومىرلىك ۇستانىمدارىمنىڭ ءبىرى – «جۇرتقا زيانىم ەمەس، پايدام ءتيسىن!».
P.S. مىنە، الىپ الماتىنىڭ تازالىعىنا جاۋاپتى جاندارمەن بولعان از-كەم سۇحباتىمىز وسىلاي ءورىلدى. ال ەگەر ءسىز كوشەدە كەلە جاتىپ، الدىڭىزدان قىزعىلت سارى جيلەت كيگەن ەڭبەك ادامىنىڭ جولىڭىزداعى قاردى كۇرەپ نەمەسە اياعىڭىزدىڭ استىن، ايالدامانىڭ جان-جاعىن تازالاپ جۇرگەنىن كورسەڭىز، «راقمەت سىزگە!» دەپ ايتۋدى ۇمىتپاڭىزشى. ولار ءىلتيپاتىڭىزعا ءسوزسىز لايىقتى.
"اlmaty-akshamy" №152 (6287) 22 جەلتوقسان، 2022 جىل