جەپ-ىشۋدەن عانا ەمەس، كۇنا اتاۋلىدان، جاماندىقتان تيىلۋ ماۋسىمى.
الماتى قالاسىنىڭ باس يمامى تولەبي وسپان قالا تۇرعىندارىن رامازان ايىمەن قۇتتىقتادى، دەپ حابارلايدى Almaty-akshamy.kz
اسسالاۋما عالايكۋم، قادىرمەندى قاۋىم! قاسيەتتى رامازان ايىنا امان-ەسەن جەتكىزگەن ۇلى جاراتۋشى جاببار يەمىزگە ماداق-ماقتاۋلار بولسىن! بەرەكەلى رامازان ايىمەن بارشاڭىزدى شىن جۇرەكتەن قۇتتىقتايمىن!
رامازان – تيىلۋ ايى. جەپ-ىشۋدەن عانا ەمەس، كۇنا اتاۋلىدان، جاماندىقتان تيىلۋ ماۋسىمى. ءاسىلى، كۇنى بويى اش ءجۇرىپ ورازا ۇستاۋ قيىن ەمەس. ەڭ قيىنى ون ەكى مۇشەمىزگە ورازا ۇستاتۋ.
پايعامبار وسيەتىندە: «كىمدە-كىم جامان ءسوزى مەن جامان ىس-ارەكەتتەن تيىلماسا، ونىڭ تاماق جەۋدەن جانە سۋسىن ىشۋدەن تيىلعانى اللا تاعالاعا ەشبىر كەرەگى جوق»، - دەگەن.
سونىمەن قاتار كورنەكتى عالىم يمام عازالي «ورازانىڭ ءۇش دەڭگەيى بار»، – دەگەن. ولار: «كوپشىلىكتىڭ ورازاسى (ۋمۋم)، ەرەكشە ورازا (حۋسۋس) جانە ارنايى ورازا (حۋسۋس ءال-حۋسۋس). كوپشىلىكتىڭ ورازاسى – اسقازان مەن قۇمارلىقتان تىيىلۋ. ەرەكشە ورازا – قۇلاق پەن كوزدى، ءتىل مەن قول-اياقتى جانە باسقا دا دەنە مۇشەلەرىن كۇنا اتاۋلىدان تىيۋ. ال، ارنايى ورازا – جۇرەك ورازاسى. بۇل – جامان وي مەن دۇنيەلىك پىكىردەن تۇتاستاي ارىلىپ، اللادان باسقا بارلىق ويدان تولىعىمەن تىيىلۋ»، – دەيدى.
دەمەك، دەنە-مۇشەلەرىمىزدى تەرىس ىس-ارەكەتتەن تىيۋ ورازا تالاپتارىنىڭ ءبىرى. سول سەبەپتى، كوپپەن كورگەن ۇلى توي دەپ تەك تاڭەرتەڭنەن كەشكە دەيىن ىشىپ-جەۋدەن تيىلۋ عانا ەمەس، ورازانىڭ جوعارىدا ايتىلعان تاربيەلىك تاعىلىمىنا ءمان بەرگەنىمىز ءجون.
الماتى مەشىتتەرىندە قاسيەتتى رامازان ايىن اتاپ ءوتۋ ءۇشىن ارنايى جوسپار بەكىتىلدى. قالا مەشىتتەرىنىڭ دايىندىقتارى پىسىقتالدى. بيىل قالاداعى 54 مەشىتتىڭ 50-ىندە تاراۋيح نامازىندا قۇران حاتىم ءتۇسىرىلىپ، ەلدىڭ اماندىعى ءۇشىن دۇعا جاسالادى.
رامازان ايىندا ورىندالاتىن ساۋاپتى ىستەردىڭ ءبىرى – كوپشىلىككە اۋىزاشار داستارحانىن جايۋ. الماتى ورتالىق مەشىتىندە «رامازان شاتىرى» قۇرىلىپ، كۇندەلىكتى 500 كىسىگە اۋىزاشار داستارحانى جايىلماق. سونداي-اق، قالا مەشىتتەرىندە دە اۋىزاشار بەرىلەدى. اۋىزاشار بەرگىسى كەلەتىن كىسىلەر قالا مەشىتتەرىندەگى جاۋاپتى ماماندارعا جولىعۋلارىنا بولادى. (بايلانىس تەل.: 8 708 905 66 85).
بيىلعى جىلدى مۋفتيات «يسلام جانە ءداستۇر قۇندىلىعى» جىلى دەپ جاريالاۋىنا وراي، رامازان ايىنداعى ءىس-شارالار سالت-داستۇرىمىزبەن ساباقتاستىرىپ وتكىزىلەتىن بولادى. مىسالى، ورازا ايى ءاز ناۋرىز مەرەكەسىنە سايكەس كەلگەندىكتەن اۋىزاشار كەزىندە مەشىت قوناقتارىنا ناۋرىز كوجە، باۋىرساق تارتۋ ەتىلمەك. اۋىزاشار وتەتىن ورىنداردى قازاقي ناقىشتا بەزەندىرىپ، رامازاننىڭ كەلگەنىن سۇيىنشىلەۋ ماقساتىندا جاراپازان جىرى ايتىلادى.
قالا تۇرعىندارى مەن قوناقتارى ورازا كەستەسىن مەشىتتەردەن الۋىنا بولادى. سونىمەن قاتار ورازا كەستەسى مەن رامازانعا قاتىستى اقپاراتتاردى «muftyat.kz» جانە «azan.kz» سايتتارىنان تابا الادى.
Call ورتالىق
ورازاعا، جالپى ءدىني ماسەلەگە قاتىستى قانداي دا سۇراقتار بولسا قازاقستان مۇسىلماندارى ءدىني باسقارماسى جانىنان اشىلعان ءدىني اقپارات بەرۋ ورتالىعىنان جاۋاپ الۋعا بولاتىندىعىن حابارلايمىز. ورتالىق ءنومىرى – 8 (707) 233-30-30. WhatsApp: +7 (707) 662 6561. سونداي-اق، الماتى ورتالىق مەشىتىنە قاراستى ورتالىق نومەرى – +7 707 939 7708.
رامازان دارىستەرى
بۇل ايدا پايعامبارىمىز (س.ع.س.) ەكى نارسەگە قاتتى كوڭىل بولگەن. ءبىرىنشىسى – قۇران وقۋ بولسا، ەكىنشىسى – قايىرىمدىلىق جاساۋ. سول سەبەپتى، الماتى ورتالىق مەشىتىندە اپتاسىنا بەس كۇن بەسىن نامازىنان كەيىن ورازاعا قاتىستى تاقىرىپتاردا ناسيحات ايتىلىپ، قالا مەشىتتەرىندە قۇران الىپپەسى مەن ناماز ۇيرەتۋ كۋرستارى جۇرگىزىلەدى.
سونىمەن قاتار مەشىتتەردە كۇندەلىكتى تاراۋيح نامازىنىڭ الدىندا ەلدى ىنتىماق پەن بىرلىككە شاقىراتىن تانىمدىق ۋاعىزدار مەن ورازانىڭ حيكمەتتەرى جونىندە دارىستەر جۇرگىزىلەتىن بولادى. ودان بولەك «30 كۇنگە 30 ۋاعىز» جانە «رامازان جانە يحسان» تاقىرىپتارىندا ۆيدەو ۋاعىزدار وقىرماندارعا ۇسىنىلماق. «باقىتتى جانۇيا – ءداستۇر جالعاۋشىسى» تاقىرىبىندا نەكە قيعان جاس-جۇبايلارعا سەمينار وتكىزۋ دە جوسپارعا ەنگىزىلىپ وتىر. ناسيحات جۇمىستارىنا رانت پەن جانت مۇشەلەرى تارتىلاتىن بولادى.
قايىرىمدىلىق شارالارى
رامازان – قايىرىمدىلىق ايى. جاقسىلىقتار ەسەلەنەتىن اي. اللا ەلشىسى (س.ع.س.) ءبىر وسيەتىندە: «ساداقانىڭ ابزالى – رامازان ايىندا بەرىلگەن ساداقا»، - دەپ سۇيىنشىلەيدى. الماتى مەشىتتەرىندە ورازا ايىندا «شاراپاتتى رامازان»، «رامازان قورجىنى»، «رامازان سىيى»، «جومارت جۇما» سىندى اۋقىمدى قايىرىمدىلىق ءىس-شارالاردى ۇيىمداستىرۋ جوسپارلانۋدا. سونىمەن قاتار «ەل ۇلەسى پاتەرگە» جوباسىن جۇزەگە اسىرۋ دا قولعا الىنباق.
راقىم ايى – رامازان قۇتتى بولسىن! قاسيەتتى ايدا ۇستاعان ورازامىز، جاساعان دۇعا-تىلەكتەرىمىز، قۇلشىلىق-عيباداتتارىمىز، ءاربىر قايىرلى امالدارىمىز قابىل بولعاي! اللا تاعالا وتباسىمىزعا اماندىق، جۇمىسىمىزعا بەرەكە-بىرلىك ءناسىپ ەتكەي! تاۋەلسىزدىگىمىز باياندى، ەلىمىز امان، جۇرتىمىز تىنىش بولعاي! ءاۋمين!