سۇراق:
بوستاندىق اۋدانىندا وتكەن كەزدەسۋدە تۇرعىندار بۇقار جىراۋ بۋلۆارى مەن ەسەنتاي وزەنىنىڭ قيىلىسىندا جوسپارلانعان تۇراقتىڭ قۇرىلىسىنا قاتىستى سۇراق قويدى.
«ءبىز جوبانى كورگەن جوقپىز جانە تج كەزىندە سكۆەرسىز جانە جينالاتىن ورىنسىز قالامىز با دەپ قورقامىز. بوس، جاسىل كەڭىستىك قالا ما؟».
جاۋاپ:
الماتى اكىمى 200 كولىككە ارنالعان كوپ دەڭگەيلى اۆتوتۇراق سالۋ قاجەتتىگىن اتاپ ءوتتى، ويتكەنى اتالعان تۇك اۋلاسى مەن بۇقار جىراۋ بۋلۆارىندا كولىك كوپ. بۇل جەدەل جاردەم، ءورت ءسوندىرۋ قىزمەتى ماشينالارىنىڭ وتۋىنە كەدەرگى كەلتىرەدى. جوبا اۋلا مەن بۋلۆارعا تۇسەتىن جۇكتەمەنى ازايتۋعا مۇمكىندىك بەرەدى، تج كەزىندە جاسىل ايماقتار مەن جيناۋ ورنى قاراستىرىلعان. ۋچاسكە كوممۋنالدىق مەنشىكتە، سوندىقتان اكىمدىك جوباعا سايكەس قۇرىلىستىڭ بارىسىن قاتاڭ قاداعالايدى.
«قالا مەن ونىڭ تۇرعىندارى ءۇشىن جۇمىس ىستەپ جاتقانىمىزدى بىلەسىز. قالا العا جىلجىپ، دۇرىس دامىپ كەلەدى. ءبىز بىرنەشە جىل بويى قوردالانعان تۇيتكىلدى ماسەلەلەردى شەشۋگە تىرىستىق. قالاعا تيەسىلى اۋماقتاردا جاسىل ايماقتار مەن ويىن الاڭدارى قۇرىلادى. بىلتىر سكۆەرلەر مەن ساياباقتار ءۇشىن 37 ملرد تەڭگەگە جەر ساتىپ الىندى، بيىل تاعى 45 ملرد تەڭگەگە جەر تەلىمدەرىن ساتىپ الۋدى جوسپارلاپ وتىرمىز. قالانىڭ قاجەتتىلىگى ەلەۋسىز قالمايدى. اقىلعا قونىمدى تەڭگەرىم قالپىنا كەلتىرىلەدى»، - دەپ ەربولات دوسايەۆ ەكى مىڭىنشى جىلداردىڭ باسىندا جەكەشەلەندىرىلگەن ۋچاسكەلەر تۇرعىندار ءۇشىن ساتىپ الىناتىنىن اتاپ ءوتتى.
بۇعان دەيىن، بوستاندىق اۋدانىن دامىتۋ جونىندەگى باياندامادا قالا اكىمى اباي جانە گاگارين داڭعىلدارىنىڭ قيىلىسىندا اۋدانى 1 گا ۋچاسكەنى اباتتاندىرۋ جالعاسىپ جاتقانىن حابارلادى. بيىل تامىزدا بالالار جانە سپورت الاڭدارى، يتتەردى سەرۋەندەتۋ ايماقتارىن سالۋ، دەمالۋعا ارنالعان ورىندىقتار ورناتۋ جانە سۋارۋ جۇيەسى بار جاسىل جەلەكتەر اياقتاۋ كوزدەلگەن.
بۇعان قوسا، بيىل تۇڭعىش پرەزيدەنت ساياباعىن، «اتاكەنت» ءقىىو اۋماعىن جانە «يۋجنىي» ساياباعىن قايتا قۇرۋ مەن اباتتاندىرۋ اياقتالادى. سونىمەن قاتار، سيرك الدىنداعى، مۇستافين كوشەسىنىڭ بويىنداعى جانە ءال-فارابي اتىنداعى قازۇۋ ستۋدەنتتەر سارايىنىڭ الدىنداعى سۋبۇرقاقتار كۇردەلى جوندەۋدەن وتەدى.