3 ءساۋىر كۇنى مۇسىلمان قاۋىمعا قاسيەتتى رامازان ايى باستالادى.
بۇگىن ەلوردادا باس ءمۇفتي ناۋرىزباي قاجى تاعان ۇلىنىڭ توراعالىعىمەن قازاقستان مۇسىلماندارى ءدىني باسقارماسىنىڭ كەڭەيتىلگەن ءتورالقا ءماجىلىسى ءوتتى، دەپ حابارلايدى Almaty-akshamy.kz قمدب-عا سىلتەمە جاساپ.
الدا كەلە جاتقان رامازان ايىنا دايىندىقتى پىسىقتاۋ ماقساتىندا وتكەن ماجىلىسكە نايب مۇفتيلەر، باس ءمۇفتي كەڭەسشىلەرى، ءبولىم باسشىلارى جانە 19 وكىلدىكتىڭ باس يمامى قاتىستى.
جيىندا قمدب ءتوراعاسى، باس ءمۇفتي ناۋرىزباي قاجى تاعان ۇلى ارنايى بايانداما جاساپ، ۇلىق ايدا اتقاراتىن جۇمىستاردى جۇيەلەپ، تىڭعىلىقتى دايىندىق جاساپ، ورازانىڭ قادىر-قاسيەتىن جاماعاتقا كوبىرەك ناسيحاتتاۋعا شاقىردى.
نايب ءمۇفتي، شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربان ۇلى ءپىتىر ساداقاسى، زەكەت، ءپىديانىڭ بيىلعى مولشەرى، ءدىني ءبىلىم جانە كادر دايىنداۋ ءبولىمىنىڭ مەڭگەرۋشىسى سمايىل سەيتبەكوۆ قۇران حاتىم وقۋ توپتارىن بەكىتۋ، قاريلاردى مەشىتتەرگە ءبولۋ، ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ رامازان ايىندا ونلاين جانە وفلاين دارىستەر، ۋاعىز-ناسيحاتتار جانە تاراۋىق نامازىن وتكىزۋ جايلى بايانداما جاسادى.
اقپارات جانە قوعاممەن بايلانىس ءبولىمىنىڭ مەڭگەرۋشىسى اعابەك قونارباي ۇلى رامازان ايىندا دارىستەر، سۇحباتتار، تىكەلەي ەفيرلەر ۇيىمداستىرىپ، ب ا ق بەتتەرىندە ۇلىق ايدىڭ ناسيحاتىن كۇشەيتۋ، اقپارات جانە قوعاممەن بايلانىس ءبولىمى مەڭگەرۋشىسىنىڭ ورىنباسارى نۇربەك ەسماعانبەت اقساقالدار كەڭەسىنىڭ الداعى جۇمىسىن ىلگەرىلەتۋ، «زەكەت جانە قايىرىمدىلىق» قورىنىڭ ديرەكتورى قانات قىدىرمين رامازاندا اتقارىلاتىن قايىرىمدىلىق شارالارى، قاجىلىق ءبولىمىنىڭ مەڭگەرۋشىسى ءجاندىللا بەكجىگىتوۆ مەشىتتەرگە اتاۋ بەرۋ جانە كىشى قاجىلىق جۇمىستارىنىڭ جاي-جاپسارى، «MUNARA TV» تەلەارناسىنىڭ ديرەكتورى نۇرجان دارقۇلوۆ رامازان ايىندا كورەرمەندەر كوڭىلىنەن شىعاتىن باعدارلامالار ۇيىمداستىرۋ جايلى بايانداسا، قمدب اپپارات باسشىسى عىلىمبەك ماجييەۆ رامازان ايىندا وبلىستارداعى وكىلدىكتەردە اتقارىلاتىن ءىس-شارالاردىڭ نەگىزگى جوسپارىن تانىستىردى.